"Nhai imi, vanhu vanonditi ndini ani?"

Svondo 24 Regore B

Izaya 50:45-9a; Jemisi 2:14-18; Mariko 8:27-35

“Nhai imi, vanhu vanonditi ndini ani?”

Pane chimwe chikoro Mudzidzisi Mukuru, Mr Moyo, vaitsvinyirwa kuti vaRangwani nekuti vakanga vari varefu. Chimwe chikomana chakafunga zvekusaenda kuchikoro rimwe zuva. Chikati zano rakanaka kufonera kuchikoro ndichiita saamai vangu, ndovaudza kuti John ari kurwara. Chakaridza foni ichibva yadairwa nemukuru wechikoro pachake:

VaMoyo: Kudzidza Ishungu School. NdavaMoyo vari kutaura.

John: Mangwanani vaRangwani. Ndinoda kukuzivisai kuti mwana wangu     John ari kurwara saka haasi kuuya kuchikoro nhasi.

VaMoyo: Zvakanakai. Ndingazivewo  here kuti ndiyani afona?

John: Hongu vaRangwani. Ndini amai wangu!

Kana uri mukuru wechikoro, weparish, wemhuri, wepabasa kana weboka ripi, igaroziva kuti vanhu vane zita rekunemera ravanokupa, risiri zita rako repachitupa. Rinodaidzwa usinganzwi asi haritani kunamira pauri. Dzimwe nguva zita iri rinoenderana nezvauri uye unogutsikana naro. Asi dzimwe nguva haufari nezita iri nekuti rinotaura zvauri, sekuonekwa kwazvinoitwa nevamwe, asi iwe usingadi kuti zvizivikanwe kana kutaurwa.

Panozoita mumwe munhu anogona kupisira oita kuti uzive kuti vanhu vanokudaidza kuti ani. Kana zvinoonekwa nevanhu zviri pauri zviri zvinhu zvawakasununguka nazvo, unogona kuseka nekufara paunonzwa zita rako iri. Asi kana zita iri richikuyeuchidza zviya zvaunoda kuti zvisafe zvakazivikanwa nemunhu, unogumbuka chaizvo. Vanhu vazhinji vanoziva kuti vane zita ravanopihwa asi vanosarudza kusariziva, zvongovharana zvakadaro. Iwe ungade here kuti vanhu vakuudze kuti vanokudaidza kuti ani, zvisiri zvepachitupa?

Mudama rakanaka ranhasi tinoona Kristo achibvunza vadzidzi wake mubvunzo uyu, wakatiomera tose: “Nhai imi vanhu vanonditi ndini ani?” Funga baba kana amai vako, mukuru wekubasa kwako kana kuparish kwako, akakubvunza mubvunzo uyu. Ngatitii iwe unoziva zita raanonemerwa, ungamuudza here kuti vanhu vanokutii Hariyatsva, kana kuti Benyumundiro, kana kuti Malema?

Kubvunza kwaanoita uku, Kristo anotiratidza kushaya kutya kwake, kana kuti kushinga kwake. Nekuti kuudzwa zvauri nevamwe kunoda wakashinga mwoyo.  Kushinga kwakadai kunobva mukuziva zvauri nepaumire pamberi paMwari. Kristo aive neruzivo ruzere pamusoro pehunhu hwake nehuMwari hwake zvekuti akanga asingatyi uye asineyi nekuti vanhu vanganditi ndini ani. Ruzivo runosunungura urwu runobva mukubatana naMwari nguva dzose, zvikuru mukunamata. Munhu ane hukama hwakadai naMwari haatyi kana kuzeza marehwarehwa evanhu.

Vadzidzi vanopindura Yesu nekumuudza zvinotaurwa nevanhu pamusoro pake: “Vamwe vanokutii Yowane mubhapatidzi, vamwe vachikutii Eriya, vamwewo vachikutii muri mumwe wevaprofita.” Asi Kristo haagumiri ipapo, anodzikisa gejo, obvunza akavananga ivo: “Ko imi munonditi ndini ani?” Kristo anoda kuona kuti vadzidzi vake ava vari kumuziva zvechokwadi here kana kuti vari kungoitawo gudzamudungwe kufanana neruzhinji.

Kuziva Kristo kwechokwadi, kwete zvemarehwarehwa evanhu, kana zvemanzwiranzwira ndiko kunotiponesa, uye ndicho chinhu chatinofanira kuvavarira nehupenyu hwedu hwese. Pauro anoti: “Asi ndakaona zvinhu zvese semarara pamusana pekukosha kukuru kwekuziva Kristo, Mambo wangu.” (VaFiripi 3:7) Anoti zvakare: “Pandaive nemi ndakazvipira kuti handina chimwe chinhu chandichaziva kunze kwaiye Kristo ega, iye nyakurovererwa pachipiyaniso.” (1Vakorinde 2:2). Iye Kristo pachake akati: “Zvino hupenyu husingaperi ndihwo uhwu: kuti vakuzivei, imi Mwari mumwechete wechokwadi, naYesu Kristo, uyo wamakatuma.” (Johane 17:3).

Kristo zvaanobvunza vadzidzi vake, haasi kuda kuvafumura kana kuvabatikidza mazita avanomunemera nekumutsvinyira nevanhu. Chinangwa chaKristo ndechekuti vadzidzi vazive iye Krsito, nyakutumwa, nyakuteerera, nyakutifira, nyakumuka muvafi, nanyakutiwanira hupenyu husingaperi. Kristo anoda kuvadyara, kuti vadzike midzi yavo munaMwari kuburikidza nekuziva iye Kristo.

 Shungu yaKristo yaakazadzikisa pamberi pekutifira kwake ndeiyi: “Ndakaitisa kuti zita renyu rizivikanwe nevanhu avo, vamakandisarudzira muvanhu vapasi pano, kuti muvape kwandiri. Vakanga vari venyu mukabva mavapa kwandiri , ivowo vakachengeta dama renyu. Zvino vava kuziva kuti zvose zvamakandipa zvakabva kwamuri; nokuti mazwi amakandipa ndakaapawo kwavari, ivowo vakaagamuchira vakabva vaziva zvechokwadi kuti ndakabva kwamuri, vachitenderawo kuti imi ndimi Nyakundituma.” (Johane 17:6-8).

Saka tinoona Kristo achitaurira vadzidzi vake pachena, asingambovanzi zvekuti ayifanira kutambudzika zvakanyanya, kurambwa, kuurayiwa nekuzomuka muvafi. Iri ndiro zita raKristo rechokwadi raanoda kuti vadzidzi vake vabatisise. Hunhu hwake nehuMwari hwake zvinozadzikiswa nekuzvipira kwake kutitambudzikira nekutifira. Ndizvo zvakaporofitwa naIsaya muchidzidzo chechiposhi kuti: “Handina kuramba kumuteerera, handisakamupa gotsi. Ndakarega vavengi vachindipura musana, ndakarega matama angu achikakatwa ndebvu. Handina kudzivira uso hwangu kuna vaindikanda mbama nokundipfira mate.”

Petrosi paanonzwa izvi anoda kutsiura Kristo nekuti anotya kuti vanhu vakaziva chokwadi ichi vangaore moyo vakatiza Kristo. Asi Kristo anodisa kuti chokwadi ichi chizivikanwe kunyangwe dai chichirwadza sei. Kristo anotaurira vanhu pachena kuti: “Kana munhu achida kunditevera, ngaazvirambe iye pachake, atakure chipiyaniso chake, anditevere, nokuti uyo anoda kuzvichengeta achazvirasa, asi uyo anozvirasa nokuda kwedama rakanaka ndiye achazviponesa.” Ndizvo zvinoreva zita raKristo rechokwadi, ratinozvinemera naro kuzviti VaKristo!

Jemusi musande, muchidzidzo chechipiri, anotichenjedza kuti tisaite chitendero chekutaura bedzi chisina mabasa. MunaKristo tinoona munhu akaratidza chitendero chake nemashoko zvese nezviito. Kristo zvaanotaura kuti achaita nudama ranakanaka ranhasi – kutifira pachipiyaniso – anozviita chokwadi zvichionekwa nemunhu wese. Chitendero chake nemabasa ake hazvina kuparadzana, zvakaringana. Jemusi musande ari kutikurudzira kuti tivewo saizvozvo.

Ukaziva zita remunhu, rechokwadi, repachitupa, unenge wave nesimba pamusoro pemunhu iyeye. Unogona kumutsvaga ukamuwana, unogona kumutevera kusvika paanogara. Munhu waunoziva zita rake anenge ave munhu wako. Zita remunhu harisi ruzha runobva mukanwa, kana mavara akanyorwa pabepa bedzi. Zita remunhu rakafanana nemwoyo nemweya wemunhu pachake. Zita remunhu rinoyera nekukosha zvakaita munhu iyeye. Zita remunhu rinoremekedzwa nekukudzwa semuridzi waro.

Nhasi Kristo ari kutibvunza kuti: Nhandi imi, vanhu vanonditi ndini ani? Anonenderera mberi nekutibvunzazve kuti: Ko imi munonditi ndini ani? Iwe pachako, pauri ipapo unopindura Kristo uchiti kudii? Ungapindure here zvizere saPetrosi kuti: “Ndimi Kristo.” Kana ukabvunzwawo unokwanisa here kudaira kuti: “Ndiri muKristo” kana kuti unoita saJonso akabvunzwa navaMoyo kuti ndiyani akati: “Ndini amai vangu!”

Zvese nemunaKristo Mambo wedu. Amen.

©Fr. William Guri, C.Ss.R., 13/09/2015, Annapolis MD USA.

"Vakakomborerwa vanonzwa dama rakanaka vachiritendera!"

Svondo 23 Regore B

Izaya 35:4-7a; Jemisi 2:1-5; Mariko 7:31-37

Pauro Musande akati kuvaRoma: “Munhu ari wose anodaidza zita raTenzi, achaponeswa. Asi vangamudaidze sei kana vasina kumutendera? Ko vangamutendere sei kana vasakambomunzwa nezvake? Ko vanganzwe nezvake sei kana pasina avaparidzira? Ko vangaparidze sei kana vasina kutumwa kundoparidza? Nekuti ndizvo zvakanyorwa (naIzaya) kuti: “Dzakaropafadzwa tsoka dzeuyo anoparidza dama rakanaka.’ ” (Rom:10:15-15).

Pauro anotidzidzisa kuti chitendero, neruponeso, zvinobva mukunzwa dama rakanaka raKristo (Rom 10:17) Johane anotanga rungano rwedama rakanaka  nekutiziviza nezveIzwi. Pakutanga kwakanga kuina Izwi, Izwi aigara naMwari, Izwi ndiye Mwari …. Izwi akava munhu akagara nesu. Akauya kune vekwake, asi havana kumutendera. Ani naani anotendera kuti Krsito ndiye Mwanakomana waMwari nyakutumwa (ndiko kuti Izwi) achawana hupenyu husingaperi. Hupenyu husingaperi kukuzivai (imi Mwari) naYesu Kristo wamakatuma.

Kutadza kunzwa dama rakanaka kutadza kunzwa Izwi raMwari, uye kutadzawo kugamuchira ruponeso nekutadza kuwana hupenyu husingaperi. Yesu akanga asina mashoko akareruka kune avo vaitadza kunzwa dama rakanaka pamusana pekuomesa moyo yavo. “Ndingafananidze neiko rudzi urwu? Rwakafanana nepwere dziri pamusika dzinoti kune vamwe vadzo, ‘Takuridzirai hwamanda asi hamuna kutamba, tikawungudza asi hamuna kuchema…’” (Mateu 11:16-17)

Jeremiya akatukawo vana vaJakopo achiti: “Chinzwai imi mapenzi evanhu vasina njere, mune nzeve asi hamunzwi, mune maziso asi hamuoni…” (Jer 5:21) Izaya akatiwo: “Munonzwa asi hamunzwisisi, munoona asi hamuonesesi” (Is 6:9).  Saka Kristo akasarudza kutaura nemadimikira nekuti vanhu vakanga vasingadi kuteerera: “Saka ndichivataurira nemadimikira nekuti kunzwa vanonzwa asi havatongonzwi, kuona vanoona asi havatongooni” (Mateu 13:13).

Kristo akasangana nekusada kuteerera, nekuramba kugamuchira Izwi kwevanhu vake zvikamurwadza chaizvo. MuDama rakanaka ranhasi anosangana nemunhu akanga asingagoni kunzwa kana kuteerera pamusana pekuti akanga akaremara, ari matsi uye chimumumu. Kutadza kunzwa kwake kwakanga kusiri kuomesa moyo, kana kuzviitisa. Kana dai dama rakanaka raiparidzwa aripo, akanga asingagoni kurinzwa nekuritendera, nekuponeswa naro. Hapana chaaigona kuita kuti Izwi apinde maari agogara ari maari.  Ko aizowanawo sei hupenyu husingaperi hunobva mukuziva Kristo, anonzwikwa panoparidzwa dama rakanaka?

Munhu aive matsi nechimumu uyu akanga asingagoni kuzvinzwirawo mashoko erufaro nechivimbiso akataurwa naIzaya: “Taurirai vano moyo unotya muchiti, ‘Tsungai moyo! Rasayi kutya kwenyu! Onai Mwari wenyu ava kuuya: anouya kuzotsividza anozoripisa vakakutadzidai. Anouya iye pachake kuzokununurai’” Hapana kana chinhu chimwechete chaaigona kunzwa pamashoko akanakisisa aya. Mashoko aya akanakira munhu wese saka nyakuaparidza achinzi tsoka dzake dzakaropafadzwa mujinga megomo, uyo anounza dama rakanaka. (Is 52:7)”

Jemisi musande anotirayira kuti tisaite rusarura mumba maMwari nekuti tingadaro tikatadzisa vamwe kunzwa dama rakanaka reruponeso. Tikaita rusarura tafanana nemunhu anouraya nzeve dzemumwe kuti atadze kunzwawo mashoko eruponeso. Tine muyedzo wekuchingamidza nekugamuchira zvakanaka vapfumi, asi tichidzingira varombo kure. Mukuita izvi tinenge tichiita kuti pamusoro pehurombo hwavo varombo vatadze kunzwawo dama rakanaka. Jemisi anotichenjedza kuti: “Handiti Mwari akasarudza avo vanoonekwa nevadi vezvapasi savarombo kuti vave vapfumi mukutendera, vabve vogara nhaka youmambo hwakapikirwa avo vane rudo here?”

Saka Kristo anosangana nemunhu uyu, akanga asingagoni kunzwa dama rakanaka, nekuriparidzawo kune vamwe. Kristo akamunzwira tsitsi chaizvo. Akarwadzirwa munhu uyu nekuti aiziva kuti rupeneso rwaaipa kuvanhu pachena, hwaida kuti munhu azvinzwire dama rakanaka. Kristo haana kugona kusiya munhu uyu ari murima rekusanzwa iri. Moyo waKristo, moyo munyoro moyo waYesu, wakakotamira kwaari. Nyasha netsitsi, tsiye nyoro nekunzwira munhu uyu marwadzo ake ndizvo zvakaita kuti Kristo amutore aende naye parutivi, amurape, apore. Ndokuchitanga kwake kunzwawo mashoko akanaka eruponeso.

Kristo anodisa chaizvo kuswedera padyo nevanhu vasingagoni kunzwa dama rakanaka kuti vaponeswe. Kune zvipingaidzo zvakawanda zvehupenyu zvinotadzisa munhu kuti anzwe dama rakanaka. Hahusi humatsi hwega, asi rutadzo, hudzvanyiriri, kushaya ruzivo, kushaya chekubata, kurwara nekurwarirwa, kurasikirwa nechekuraramisa, kushaya basa, kushaya anoroora kana wekuroora, kushaya mbereko, kutadza kugarisana nehama…nezvimwe zvigozhero zhehupenyu zvinogona kutiita matsi dzisinganzwi dama rakanaka uye zvimumumu zvisingagoni kuparidza dama rakanaka muhupenyu hwedu nhasi. Rinoparidzwa raparidzwazve tiripo, asi kana tiri matsi muhana dzedu, tinganzwe asi tisinganzwisisi, tigoona tisingaonesesi.

Ngatitendeukirei kunaYesu timukumbire kuti atirape humatsi huri hupi hwatiinahwo hunotitadzisa kugamuchira dama rakanaka nekuritendera nekuwana hupenyu husingaperi. Tikazarura moyo yedu nepfungwa dzedu, Kristo anouya kwatiri oti: “Ephphata!” ndiko kuti “Dzivuka!” nzeve dzedu dzobva dzadzivuka nechinotibata rurimi chinobva charegedza, ndokubva tonzwa nekutaura zvakanaka.

Vakanyanyokomborerwa zvavo avo vanonzwa dama raMwari vachiritendera.

Amen.  

©Fr. William Guri, C.Ss.R., 05/09/2015, Annapolis MD USA.

Moyo wangu une nyota yaMwari...

Svondo 22 Regore B

Dhuteronomiyo 4:1-2,6-8; Jemisi 1:17-18, 21b-22,27; Mariko 7:1-8a, 14-15, 21-25)

Kare kare kwaiva nemumwe muprofita waMwari. Aiva nechipo chekuona Mwari nekutaura naMwari. Ayiti kana achida kuona Mwari ayienda kusango rinoera. Asvikako, ayinanga panzvimbo inoera, opfutsa moto unoera. Ayiimba rwiyo runoera, onamata munamato unoera otamba mutambo unoera. Achinge adaro Mwari aibva auya kwaari votaurirana zvavo. 

Zvakazofa muprofita uyu, akasiira mudzidzi wake chipo ichi chekuona Mwari, nekutaurira vanhu zvaidiwa naMwari, nekutaurirawo Mwari zvaidiwa nevanhu. Zvakazofawo mudzidzi uyu, akasiirawo chipo ichi kumudzidzi wakewo, rambe zvichingodaro kwemakore nemakore, nezvizvarwa nezvizvarwa.

Zvakazoitika kuti kwakave nemudzidzi akanga asingazivi kune sango rinoyera. Uyu akatsvaga nzvimbo inoera, akapfutsa moto unoera, akaimba, akanamata nekutamba zvinoera, Mwari achibva auya kwaari, vakataurirana zvavo.

Nekufamba kwenguva kwakazova nemudzidzi akanga asisachazivi chero sango, nzvimbo, moto, munamato, mutambo kana rwiyo, zvinoera zvaishandiswa nevakuru vake vekare kudaidza Mwari kuti vataurirane. Asi akabatwa chaizvo neshungu dzekuda kutaura naMwari. Pamusana peshungu chete, Mwari akauya kwaari, vakataurirana zvavo. Apa ndipo kanofira sarungano.

Chii chatingaite kuti Mwari auye kwatiri, titaurirane naye, tichimuudza zvichemo zvedu, iye achitiudza zvaanoda kuti tiite? Kuenda kunzvimbo dzinoyera here? Kuita minamato here? Kuchengeta mitemo here? Inziyo nemitambo zvinoyera here? Kupfeka hanzu dzinoera here? Kudaidzwa zita rinoera here?

Hukama hwedu naMwari hunotanga neshungu dzekuda Mwari. Vakakomborerwa vane nzara nenyota yehururami. Mweya wangu une nyota yaMwari mupenyu. Mambo anoti ndinoda rudo kwete muteuro. Humambo hwaMwari huri mukati medu. Kare makafadzwa neropa rezvipfuwo kana nezvibereko zveminda asi zvino munoda hupenyu hwemunhu…mwoyo nekuda kwake. Gamuchirai Mambo moyo wangu wose…Ndilibe chuma chakupeleka kuMulungu wanga ndipeleka moyo wanga.

Kana mumoyo medu tisina shungu dzekuda Mwari, minamato, mitemo, mipiro, mitambo, zvipo, nziyo… nemabasa edu zvingave zvenhando. Kana ndisina rudo kutaura kwangu kunongova ruzha chete. Shungu dzekuda Mwari idzi ndidzo dzinosaka kuti vanhu vaMwari vanzi: “Ndiudzei kuti nderupi rudzi rukuru runa Mwari padyo narwo saTenzi Mwari wedu ari padyo nesu nguva yose yatinochema kwaari?”

Shungu dzekuda Mwari ndidzo dzinotiita vaitiri veshoko tisingangovi vanzwi bedzi. Ndidzowo dzinotipa “unamati chaihwo husina netsvekwa pamberi paMwari Baba vedu…hunoti: kushanyira nherera nechirikadzi dzinotambudzika nokuzvichengeta kunoita munhu kuti arege kusvibiswa nezvapasi pano.”

 Shungu dzekuda kugaroona Mwari nekukurukurirana naye, dzikazadza moyo wemunhu, zvinobuda maari zvinove zvinhu zvakanaka zvoga. Kristo anotirayira, mudama rakanaka ranhasi,  kuti zvinobuda kubva mukati memunhu ndizvo zvinosvibisa munhu kana mumoyo make makazara pfungwa dzounyangadzi, nounzenza, noubi, nouurayi, noupombwe, noruchiva, nokuita hutsinye…nokushora Mwari…

Muprofita wandakutaurirai nezvake akanga asingaonani nekukurukurirana naMwari pamusana penzvimbo inoera namanamatiro nematambire ake anoera bedzi. Asati aenda kusango rinoera, aitanga azadzwa nechishuwo chikuru, neshungu zhinji, nechido chakanyanya chekuona huso hwaMwari. Nevadzidzi vake vose, vaivawo nemwoyo wakadai, kunyange vaya vakanga vasisazivi kusango rinoera neminamato nemitambo zvinoera.

Dai Mwari atizadzawo, kekutanga, uye nguva dzose, neMweya Mutsvene kuti tive neshungu, nechido, nechishuwo mumoyo medu, chekuonana naye huso nehuso, tichimuudza nhuna dzedu, iye achitirayira kuda kwake. Mweya Mutsvene anotigonesa kunamata kuna Mwari tichiguwa zvisingagoni kududzirwa nemazwi. Amen.  

©Fr. William Guri, C.Ss.R., 29/08/2015, Annapolis MD USA.

Ndirori shoko renyu Tenzi wangu!

SVONDO 21 REGORE B

Zvidzidzo: Yoshuwa 24:1-2a, 15-17, 18b; VaEfeso 5:21-32; Yowane 6:60-69

Pane rwiyo rwandinofarira chaizvo runoimbwa tichigadzirira kunzwa shoko raMwari pamisa:

“Ndirori shoko renyu Tenzi wangu,

Shoko ramakareva, kumuranda wenyu rakandipa tariro

Shoko rinondinyaradza, munhamo dzangu

Shoko ramakandipikira, rinondiraramisa

Kunyangwe vaya vanodada vakandiseka zvikuru

Handina kutsauka pamurawo wenyu.”

Rwiyo urwu runotiyeuchidza nekutikurudzira chitendero chakasimba chatinodzidziswa neKirike mushoko raMwari. Yowane muvhangeri anotidzidzisa kuti pakutangatanga kwanganga kuina Izwi, aigara naMwari uye anovawo Mwari. Chishamiso chikurukuru chechitendero chedu ndechichi: Izwi akava munhu akagara nesu. Mambo wedu Yesu Kristo ndiye Izwi anotaurwa nezvake uyu. Ruponeso rwedu runouya nekugamuchira Izwi, anova ndiye Mwari.

Izwi rake ndiye chipo chaMwari chinoshamisa chaanopa kwatiri, pamusana perudo rwake kwatiri rwakanyanya. Rudo rwaMwari kwatiri runoshamisa nekuti rwakasiyana nerudo rwatinopanana sevanhu. Tinoda munhu anotidawo, uye anotiitira zvakanaka. Asi Mwari anotida kunyangwe tiri vatadzi vanomuitira zvakaipa. Ndosaka tichidaira tichiti: “Mambo handikodzeri kuti mupinde muneni, ingotaurai izwi chete, mweya wangu unoponeswa.” Chokwadi hatikodzerani naMwari. Asi, kunyangwe dai tisingakodzeri rudo rwaMwari, Izwi raMwari rinotiponesa.

Muchidzidzo chechiposhi tinosangana nemhinduro inopihwa nevanhu vaMwari pavanobvunzwa nemuranda waMwari kuti vakamira papi chaizvo. Muhupenyu panosvika nguva iya inonzi naTuku: Handiende kudzamara wandiudza pumire chaipoipo. Yoshuwa nevana vaIsrael vaaitungamirira vakanga vasvika panguva yakadai murwendo rwavo sevanhu vakasarudzwa naMwari. Vanofanira kuti vasarudze zviri pachena, kuramba vari panaMwari wevadzibaba wavo here, kana kuti vochiita havo madiro aJojina, vachizvisarudzira vamwe vamwari.

Sarudzo iyi yakaoma nekuti mukufamba muchitendero kwatinoita, tinosangana nemiyedzo inoda kutitsaudza kubva pana Mwari wedu, wechibarirwe, wechipikirwa, wemadzibaba edu. Matinofamba, matinogara, matinoshanda, matinoswera, matinotsvaga chekurarama nacho, matinotsvaga mafaro epanyama nepamweya, tinosangana negakavhenge, saruraude yevamwari vakasiyanasiyana. Vamwari ava vanotivimbisa kupona, kupfuma, kufara, kugarika, kudiwa, kukudzwa chiriporipo. Vanoita kuti zvatinoona Mwari wedu achinge munhu anoswererera ivo vamwari ava vanogona kubva vangotiitira nekutipa ipapo ipapo.

Saka zuva rega rega takatarisana nemuyedzo wekusiya Mwari wedu tichitanga kutevera vamwe vamwari. Dai zvaibuda pachena kuti tiri panguva yekududza patimire chaipoipo, zvaiva nyore. Asi vamwari ava vanoita setsvimbo inorova isina maungira. Vanoita sekamoto kamberevere kanozopisa matanda mberi. Vanoruma vachifurudzira segonzo. Munhu anozotongokanuka atorasa Mwari wechokwadi, amira nevamwari venhema. Nzira dzemunyengedzi dzine hutesveri hunosvosva mweya wemunhu zvinyoronyoro kudzamara munhu arasikirwa nemweya wake pachake. Inga Kristo akatsiura wani akati: Ko iye munhu anobatsirwa neiko, kuzviwanira zvapasi zvose asi achirasikirwa nemweya wake pachake?

Saka Yoshuwa anobvunza vana vaIsrael: “Kana musingadi kuteerera Mwari, sarudzai nhasi mutaure pachena kuti wamunoda kuteerera ndiyani?” Vasati vapindura iye anobva avabudira pachena paamire chaipoipo: “Kana zviri zvangu ini nevedzinza rangu, tichateerera tenzi.” Zvino zvave kwavari kufuga kana kuwarira. Vakakomborera avo vanowana mukana uyu wekupenengura hana dzavo vachisarudza zvavanoda kuita. Vazhinji vanoshaya mukana uyu saka vachizongoitawo zindoendawo rezongororo rinozodzoka ranzwa kuti rabondera. Vachingoitawo gudzamudungwe inenge yehwiza inongotevera nevakananga mudondo. Vazhinji vanongoitawo hwedhongi rinoperekedza n’ombe kudhibhi asi iro risingandotiwi.

Nekuti vakapihwa mukana uyu naYoshuwa vanhu vaMwari vakakwanisa kuona zvinhu sezvazviri, chitema kana chichena, chakanaka kana chakaipa. Tinoshayiwa vatungamiriri pamweya vanotipa mukana uyu wekupenengura hana dzedu kuti tigone kuita sarudzo dzakanaka muhupenyu. Nokudaro vana vaIsrael vakapindura zvine mutsindo kuti: “Hazvibviri kuti tiparadzane naTenzi titeerere vamwe vamwari! Handiye Tenzi Mwari wedu here akatiburitsa isu navadzibaba vedu munyika yeIjipiti mataigara tiri vatapwa? Handi Tenzi here akaita zvishamiso zviya tichizviona? Handiye here akatichengeta rwendo rwese rwatakafamba…. Aiwa nesuwo tichateerera Tenzi, nokuti iye ndiye Mwari wedu.”

Vanhu vanga varasika ava, vachitorwa mwoyo nezvimwari zvenyika itsva yavakanga vapinda zvisina maturo vachirasa Tenzi Mwari wavo akanga abva navo kure uye avaitira mabasa mazhinji anoshamisa. Kana isu tinogaroimba zuva nezuva kuti: “Haiwa Mambo mabasa enyu anoshamisa kwazvo,” tinogona kuvarairwa tikatorwa mwoyo nevamwari vasiri ivo. Kurasika inyore, asi kudzoka kunorema. Kudzoka kunorema kana tikashaya mukokeri anenge Yoshuwa, anotiyeuchidza kwatakabva nezvatakaitirwa naMwari, uye anotipa mukana wekupika pakare sekuimba kwatinoita: “Ndinoda kupika, kupika pakare kutevedza zvose zvandakatsidzira kuita…”

Zviri nyore kufuratira chitendero chechokwadi pamusana pekuti chave chekare tichimhanyirira zvitsva. Asika Kristo ndiyeye wanezuro, wanhasi, newamangwana. Chimwe chitsva chatichada nezvaKristo chii? Pauro anokurudzira Timoti achiti: “Rangarira chitendero chaambuya vako Loise, chaivawo munaamai vako Eunice, uye chandinovimba kuti chirimowo mauri…” Zviri nyore kukanganwa zvinhu zvakanaka zvakawanda zvatakaitirwa naMwari tichimhanyirira zvitsva zvatisina chokwadi nzvo. Hanzi naMacheso: “Ngwarira kurasa chiri mumaoko nekuda kuombera chavimbiswa, izvo muzere mhepo.”

MuDama Rakanaka tinoona Mambo wedu Yesu Kristo achimisa vadzidzi vake panzvimbo imwechete pakamiswa vana vaIsrael naYoshuwa kuti vaite sarudzo yakakosha iyi. Zita rekuti Yesu nerekuti Yeshuwa nderimwe chete – rinoreva kuti ‘Mwari anoponesa.’ Yesu na Yeshuwa vanotiratidza basa rinofanira kuitwa nemutumwa waMwari – kumisa vanhu panzvimbo yekuti vagone kuita sarudzo. Mozesi akazviitawo izvi: “Nhasi ndonoisa pamberi penyu mvura nemoto, hupenyu nekugarika,  rufu nekuparadzwa. Chisarudzai nhasi kuda Tenzi Mwari wenyu, kufamba munzira dzake nekuchengeta mitemo yake, kuti muwande mubudirire, iye Mwari agokukomborerai munyika yamave kupinda…”

Mushure mekunge Yesu agutsa vanhu vazhinji nechingwa chishomashoma anodisa kuvadzidzisa kuti munhu haangararami nechingwa bedzi asi neshoko (izwi) riri rose rinobva mumuromo waMwari. Nekuti vanhu vakanga vasina kubata hudzamu hwechishamiso ichi chinotaura zvakakomba pamusoro pemweya kudarika hupenyu hwenyama. Yukaristiya Sande yatinopemberera nanhasi ine hudzamu hwedzidziso iyi, yenyama neropa, chingwa chehupenyu husingaperi, muviri waKristo.

Nokudaro tinoona nhoroondo refu iri muchitsauko chechitanhatu chevhangeri yaYowane, apo Yesu anotaura nezvechingwa chehupenyu husingaperi. Paanovataurira kuti nyama yake neropa rake iye Yesu ndizvo chokudya chinopa hupenyu husingaperi, vanhu vanokahadzika nazvo. Kwavari nyama yemunhu neropa remunhu hazvingadyiwi. Kudya munhu huroyi hunorambwa nevanhu vose pasi rose. Munhu anodya nyama yemunhu anoti kutyisa ogoti kuvengwa nevanhu. Ndosaka vazhinji vevadzidzi vaYesu “vakan’un’uzhikira shoko iri” vachiti: Shoko iri rinosvotesa kwazvo, ndiani angagone kurinzwa?”

Zviri nyore chaizvo kurarama hupenyu panyama bedzi, pasina kufunga nezvemweya. Varungu vane tsumo inoti: “Rudo rwembwa ruri mudumbu.” Kureva kuti imbwa inoita rudo newe kana uchiipa chekudya. Vanhu vakaita rudo rwakadai naYesu mushure mekunge avagutsa nechingwa. Vaitoda kukumanikidza kuti ave mambo wavo, vagogara zvavo vachidya chingwa chemahara! Asi Yesu paanoda kuvakwevera kuhudzamu hwemweya tinoona vanhu vachiti du du du kudzokera shure. Vakuru vakati: Munhu anonzi gara tidye, kwete gara tife. Yesu paanotanga kutaura nezverufu rwake runotiponesa, vazhinji tinotanga kudududza kudzokera shure.

Yesu haatyi kuti zvino ndave kurasikirwa nevanhu. Haati chiregai ndingorambe ndichivafadza kuti vasandisiye. Haana kuramba achidzokorora zvishamiso kuti vanhu vanakidzwe varambe vainaye. Mazuwano tinoona vatungamiri vanoita zvose zvavanogona kuti ruzhinji rurambe ruinavo. Vanosarudza kurega kutaura nezvechipiyaniso chaKristo nekuti zvingaite kuti vanhu van’un’uzhike vavasiye. Saka, vanosimbirira zvekupfumiswa, nekubudirira, zvekuwanda kwemakomborero nekuzara kwezvipo. Vanodaro nekuti vanotya kuti vangatizwe nevanhu. Vanobudirira nekuti vanhu havadi zvinhu zvinovanetsa, vanofadzwa neminana inonakidza nzeve nemaziso kunyangwe dai zviri zvenguva pfupi.

Kristo haatyi kuti angatizwe nevanhu. Akadzidzisa kuti pindai waro nenzira yakamanikana nekuti nzira yakafaranuka inoenda kundoparadzwa. Kristo akati kana munhu achindida ngaatakure chipiyaniso chake anditeere. Akati kuJaya Mupfumi enda undotengese zvose zvauinazvo upe varombo wouya unditevere. Akati zviri nyore kuti ngamera ipinde nepaburi retsono pane kuti mupfumi apinde muhumambo hwedenga. Akatizve kana munhu asingadyi nyama yangu nekunwa ropa rangu haangavi nehupenyu husingaperi. Dzidziso yakadai iyi inokonzeresa kuti vanhu van’un’uzhike, asi Kristo haatsukunyuki paakamira panyaya iyi. Anoramba akamira semusambangwena.

Panzvimbo yekunyengetedza vain’un’uzhika nekupfavisa dzidziso yake kuti igamuchirike nyore, vanhu vafare, varambe vakamuunganira, Kristo anotoramba akasimba asingatsukunyuki. Ndizvo zvinonzi nevaManyika: “Hatidzori tsvimbo ngekuti mutiro abata kuhope!” Ndizvo zvaiimbwa nemagandanga muhondo kuti: “Hatinyengerere povo, kana kurambana nayo.” Kangani katakatsvaga kurerutsa mitemo yaMwari kana mitemo yeKirike nekutya kuti tingatizwe nevanhu? Kangani katakadzokera shure pazvisungo zvedu semhuri nekutya kuti tingasare tega? Kangani katakatadza kumirira chokwadi chatinoziva nekutya kuti vanhu vanozotitiza?

Kristo ari kuti kana dzidziso iyi ikakuomerai endai zvenyu handityi kusara ndega. Saka anotendeukira kune vane gumi, vaya vaakasarudza kuti vave pamwechete naye mubasa rake, ovabvunza asingatsengi mazwi ake kuti: “Nemiwo mava kuda kuparadzana neni here?” Kana paine munhu anonzi wako chaiye ndeuya asingatyi kukubvunza mubvunzo wakadai. Anokuda zvenhema anoda kukufadza nenhema, asi munhu anokuda zvechokwadi anozvipira kukubvunza mubvunzo wakaoma kudai. Haatyi kuti angarasikirwe newe. Vazhinji vanodaidzwa, asi vashoma vanosarudzwa. Aya ndiwo masarudzirwe anoitwa vashoma kubva muvazhinji.

Petere ndiye akapindura, nekuti Petere ndiye mukuru wevapositori. Kirike rinokoshesa hukuru hwaPetere uhu, nekudaro rinoramba rakamirawo nemhinduro yaPetere iyi: “Nhayi Mambo, tingaende kunaaniko, imi muri’mi muna mazwi oupenyu husingaperi? Uye isu takatendera, tikaziva kuti imi ndimi Mutsvene waMwari.” Kune chirevo chechiLatin chinoti: Roma locuta causa finita est – chinoreva kuti panenge paine nyaya dzinenge dzichinetsa muchitendero zvinenge zvataurwa nemubhishopi weRoma ndizvo zvinopedza gakava. Chirevo ichi chinobva pakucherechedza kunoita Kirike kukosha kwemhinduro yaPetere iyi.

Takatarisana nesarudzo yevana vaIsarael pakati pevamwe vamwari naTenzi Mwari. Takatarisanazve nesarudzo yevadzidzi pakati pekugamuchira shoko raKristo nekuriramba. Takatarisanawo muhupenyu hwedu zuva nezuva  nesarudzo pakati pechakanaka nechakaipa. Pachitendero chedu takatarisanawo nesarudzo pakati paMwari wechokwadi nevamwe vamwari vevadisi vezvapasi vangotekeshera kudai. Ngatisarudzei sevana vaIsrael. Ngatisarudzei sevapostori vachidairirwa naPetere. Ngatisarudzei Izwi raMwari akava munhu akagara nesu.

“Ndirori shoko renyu Tenzi wangu,

Shoko ramakareva, kumuranda wenyu rakandipa tariro

Shoko rinondinyaradza, munhamo dzangu

Shoko ramakandipikira, rinondiraramisa

Kunyangwe vaya vanodada vakandiseka zvikuru

Handina kutauka pamurawo wenyu.”

Ngatikumbirei Mwari kuti atisimbise patinosangana nemuyedzo wekutevera vamwe vamwari vasiri ivo zvakaita vana vaIsrael. Ngatikumbireiwo chitendero chinenge chaPetere nevapositori vakaziva kuti Kristo ndiye ane mashoko ehupenyu. Ngatinamatei kuti Mweya muSande atizadze nechitendero chakasimba nechitarisiro chizere nechido chisingaperi.  Amen.

©Fr. William Guri, C.Ss.R., 23/08/2015, Annapolis MD USA.

FOR THE SAKE OF THE JOY WHICH LAY AHEAD OF HIM

"Let us keep our eyes fixed on Jesus, who leads us in our faith and brings it to perfection: for the sake of the joy which lay ahead of him, he endured the cross, disregarding the shame of it, and has taken his seat at the right of God's throne" (Hebrews 12:2).

What is the joy that lay ahead of Jesus? It is the joy of completing his task well, fulfilling the will if his Father, and happily rejoining the Father. Having endured the most ignominious ill-treatment, and having remained steadfast and faithful through this painful passion, Jesus rejoiced: "It is finished!" and bowed his head and surrendered his spirit in death (John 19:30).

He had consummated his mission without wavering or faltering through all the opposition, betrayal, rejection, and various persecution. That is what filled him with joy. This joy was driving him on, bolstering him, galvanizing and strengthening him through the most difficult moments of the passion.

That joy was inside him all the time, even when he appeared defeated. He shares that joy, thereby revealing it to us, when he intimates it to the good thief: "Truly, truly I tell you, today you will be with me in paradise." (Luke 23:43). Jesus knew, beyond all reasonable doubt that at the end of his suffering was Paradise.

He knew this because he trusted his Father. He knew that, even if his Father had seen it to be necessary for Jesus to suffer this much, God would not go back on his word. God had prepared this glory for him from the beginning and Jesus was determined not to allow any earthily hardship, or human cruelty and evil, or his own human frailty to prevent him from attaining this glory.

He had prayed earnestly before the passion: "Now, Father, glorify me with that glory I had with you before ever the world existed." (John 17:5).

By suffering and dying for us Jesus secured this glory for us too. No matter what blows we receive from this imperfect world, the cruelty and evil intentions of our persecutors, and our own weakness and vulnerability, we must remain faithful to the Father's will, like Jesus did.

We must pray always like him when we find it most difficult: "'Father,' he said, 'if you are willing, take this cup away from me. Nevertheless, let your will be done, not mine.'" (Luke 22:42). That is how Christians, followers of Jesus, must face trials and tribulations, following the example of Christ, preferring the will of a God to our own will.

The author of the letter to the Hebrews encourages us: "Let us keep our eyes fixed on Jesus, who leads us in our faith and brings it to perfection: for the sake of the joy which lay ahead of him, he endured the cross, disregarding the shame of it, and has taken his seat at the right of God's throne" (Hebrews 12:2).

Dear sisters and brothers, for the sake of the joy which lies ahead of us, let us not conform to the standards of this world, to the mentality of this time, to the values of society, to the hardships of our personal predicament; but let us remain resolute in doing God's will, steadfast in prayer, unwavering in faith and always rejoicing in the love of Jesus Christ! Amen.