Mupiro unofadza Mwari

Svondo 32 Regore B 2015

1 Madzimambo 17:10-16; VaHebheru 9:24-28; Mariko 12:38-44

Vakuru vane tsumo inoti: “Chirango chatimba kuti nzou pinda mumba.” Timba kashiri kadikidiki kanokwana muchanza chemunhu. Nzou imhuka huruhuru chaizvo. Zvinoreveyi kuti shiri diki saTimba ingakoke mhuka huru saNzou kuti ipinde mumba mayo? Kana takanyatsozvitarisa tinoona izvi zvisingagoneki zvachose. Nzou ikada kuti ipinde mumba maTimba, zvese Timba nemba zvinobva zvaparara. Vakuru vane imwe tsumo zvakare inoti: Mukuru mukuru, hanga haigari pfunde. Inoreva kuti shiri diki, satimba inogona kugara yakadekara pamusoro pepfunde, asi shiri huru sehanga haingazvigoni.  Munhu anofanira kuziva mhumhu wake nesimba rake nezvaanogona nezvaasingagoni kuita.

Izwi rekuti chirango ndiro rakakosha patsumo yedu yekutanga. Kuitira chinhu chirango, kuita kuti mutemo wakafanira uzadzikiswe. Kana wanga wakaguta unogona kudyira chirango kuti ufadze hama yako yakupa chekudya. Kana Timba achiti kuna Nzou, “Mhukahuru pindai mumba,” ari kuita chirango, nekuti anonyatsoziva, naiye Nzou anozivawo, kuti Nzou haingakwani mumba munogara Timba. Chirango chaTimba ichi itsika dzakanaka, hunhu hwakanaka, maitiro anotarisirwa munhu kwaye kuti aite. Munhu akanaka akaona mumwe achipfuura nenzira anotarisirwa kumuyedza chekudya, anoshaya kumupa pekurara, kana kumupa rumwe rubatsiro rupi rwaangade ari parwendo. Hazvina mhosva kuti mupfuuri nenzira uyu ane chaanoshayiwa here kana kwete, asi hunhu hwakanaka hunotarisirwa. "Ngwarirai kugamuchira vaenzi nekuti vamwe vaidaro vakazogamuchira navangere, vasingavazivi."

Tikacherechedza nhoroondo yebhaibheri tinoona kuti Mwari anokoshesa zvikuru kuzvipira kunoita munhu kunyangwe dai zvaanopa zviri zvidiki. Mwari haaneyi nekuti munhu apa chinhu chikurukuru here, asi kuti munhu avipira nemoyo wake wose here. Tinoimba nechiChewa tichiti: “Ndilibe chuma chakupeleka kuMulungu wanga, ndipeleka moyo wanga.” Kunyange dai ndisina mari yekupa kunaTenzi wangu, ndinopira moyo wangu. Kuzvipira kwemunhu asina chaainacho kunofadza Mwari sekufara kungaite Nzou ikanzi naTimba: “Pindai mumba mhukahuru!” Kuita kwaTimba uku chirango chakanaka, hunhu hwakanaka, itsika dzinofadza.

Vanhu vanosarudzwa naMwari, uye vanozvipira kuita basa raMwari mubhaibheri vanhu vanenge vachionekwa sevadiki kana sevasina basa nevamwe. Tarisai Josepha munin’ina wevakoma vazhinji, ndiye akazoponesa rudzi rwese rwemba yaYakobho. Honai Mozesi, akatomboraswa mumvura, akatizira murenje, aikakama, asi ndiye akatungamirira vanhu vaIsraeri kubva muhuranda hweIjipita. Ringai Dhavita, akanga ariwo munun’una wevakoma vazhinji, asi akasarudzwa naMwari kuti ave mambo waIsraeri. Yesu Kristo pachake aiva munhu asingaverengwi, mwana waMaria wekuNazareta, kana baba muchengeti wake Josepha akanga asina mukurumbira. Kushaya chiremera kana hukuru pakati pevanhu, hazvitadzisi munhu kuzvipira kunaMwari nemoyo wake wose. Pakasarudzwa Dhaviti Mwari akataurira Samuweri kuti: “Mwari haatarisi zvinotariswa nevanhu. Vanhu vanotarisa mamiriro ekunze, asi Mwari anotarisa mumoyo.”

Muchidzidzo chechiposhi tinoona mudzimai anofunga kuti haana chaangape muranda waMwari Eriya amushanyira. Mudzimai uyu aiziva hurombo hwake, nekushaya chekubata kwake: “Ndinokupikira naTenzi Mwari wako, handina nechokudya chose, kusiya rwanza rwehupfu ruri mudende nedonhwe remafuta rasara muchinu.” Mudzimai uyu aiziva kuti kana akaita chirango chatimba mumba make makanga musina chekudya zvachose. Akanga apererwa nechekubata zvekuti akati: “Kana izvozvi zvandiri kuunganidza tuhuni kuti nditondozvibikira kasadza ini nomwana wangu, tichidya togofa zvedu.” Muhurombo hwake kufa kwakanga kusisatyisi. Varombo vanogara vakatarisana nerufu zuva rega rega. Havazivi kuti vangadyei uye kuti vangararame here mushure mekupedza zvishoma zvavainazvo nhasi. Kristo aiziva hurombo uhu ndosaka akanamata achiti: "Tipeiwo nhasi kudya kwedu kwezuva rino."

Pfumvu ine mudzimai uyu ndakamboina, nguva dzenzara nekuoma kwezvinhu muZimbabwe. Panova nekushungurudzika kukuru munhukadzi ari pamba pake akasvikirwa nevaenzi asina chekubata chaangavape. Munhukadzi angasarudze kubvisa pane kamari kakasungirirwa, ozozviona mumashure, kuti atengere vaenzi chekudya nechekunwa. Kana paine kahuku kamwechete kasara anokarokauraya, pane kuti asiye vaenzi vachienda asina chaavapa kuti vaise mukanwa. Kana muenzi wacho ari baba vezvomweya, ndinoona vanhu vachibva vatambudzika chaizvo vakatadza kuwana chavangamupe. Kana dai muenzi wacho akati kwete musazvinetse ndauya ndadya, kana kuti ndichanodya mberi, amai vari pamba pavo havagadzikani kana vasina kuita chirango chakanaka chekumupawo chekudya.

Asi Eriya anoratidza mudzimai uyu kuti kupa kwechokwadi, kana kuti chirango chaicho, hazvina mhosva kuti hapana chekupa, kana kuti chiripo chacho chidikidiki. Eriya anodzidzisa mudzimai uyu nzira yaTenzi Mwari waIsraeri: “Ndinodaro nekuti, Tenzi Mwari wavaIsraeri ndiye anotaura achiti, ‘Mudende hamuzopera hupfu, kana mafuta muchinu, kusvikira zuva iro Tenzi raanozonayisa mvura pasi.’” Nekuti mudzimai uyu akabvuma kugoverana tushoma twaaive natwo, Mwari akamutusa, akaita kuti chekudya chirambe chiripo kudzamara nguva yenzara yapera. Kusununguka mumoyo, kuzvipira kugoverana nevamwe, kuita chirango chinenge chaTimba, ndizvo zvakasaka mudzimai uyu agamuchire makomborero aMwari.

Mudama rakanaka ranhasi Kristo anocherechedza mabvisiro ayiitwa mupiro nevanhu muTembere.  Vamwe vaiuya vakadengezera, vakagukuchira, vakabatirana, vakakunga hata, vakaremerwa nezvipo zvekupira kunaMwari. Vapfumi vaikanda zvizhinji, vaizunza mazakwatira, vaipira mari ine mubvuri. Pakati pavo Jesu akaona chirikadzi yaiva murombo ichikandawo tumari tudukuduku tuviri, pamwechete twainge hafu yehafu yesendi! Takatarisa mari iyi maererano nezvaingabatsirewo kuTemberi tinoona kuti chirikadzi iyi yakangoita zvechirango chaTimba, zvekuti haungangorambi wakagara wega vamwe vachienda kunokanda zvipo.

Asi Kristo haana kutarisa sematarisiro atinoita, kwete. Kristo akaona kuti tumari tuviri utwu nditwo twose twakanga tuine mudzimai uyu. Akaona tumari utwu setuhupfu netumafuta tuya twemudzimai wekuSidhonia, twakakomborerwa naMwari tukararamisa mhuri. Kristo akaona tumari utwu sechipo chakakosha kuna Mwari nekuti nditwo twose twakanga tuine mudzimai uyu, nekudaro akapa kuna Mwari pasina chimwe chaanosara nacho. Kristo anorumbidza kupa uku kudarika kwevaye vaipa vachisara vaine zvimwe zvakawanda. Kupa kwechirikadzi iyi chirango chikuru chinoratidza kuzvipira kwakaperera, zvokusara asina nechokurarama nacho.

Muchidzidzo chechipiri tinoratidzwa kupa kunopfuura chirango chakanaka chemudzimai wekuSidhonia nechechirikadzi kuTemberi. Timba anoita chirango chakanaka chekuti Nzou pinda mumba maanonyatsoziva kuti Nzou haakwani. Ko munhu angapeiwo kunaMwari chingagutse Mwari, iye Mwari ariye muridzi nemupi wazvose? Mupiro waKristo, waanopira kunaBaba vake, wekuzvidukupisa, nekuzvikwengura, nekuteura ropa rake pachipiyaniso ndiwo mupiro wechokwadi usina chirango. Kristo akazviita chibayiro iye pachake kuti aparadze rutadzo. Hupriste hwaKristo hunobva pakuti akazviita chibayiro kamwe chete kuti abvise matadzo avazhinji. “Hakuna rudo runopfuura urwu, kuti munhu anozvipira hupenyu hwake kufira hamadzake.”Kirike rinotidzidzisa kuti pamuteuro weMisa Kristo ndiye chipo chinopirwa, ndiye Atare inopirwa chipo ichi, ndiyezve mupriste anopira chipo ichi. Chipo, Atare, mupriste - zvose zviri zvitatu - zvinomirira iye Kristo pachake. 

Patinopira muteuro weMisa pega pega tinopira mupiro mutsvenetsvene waKristo uyu. Isu pachedu hatigoni kuzvipira kuna Mwari sezvakaita Kristo. Tingangoitewo chirango chaTimba kuti Nzou pinda mumba. Asi tikabatana naKristo mupiro wedu mushoma iwoyo unofadza Mwari. Murubhapatidzo takabatanidzwa naKristo saka tinokwanisa kupira Mwari mupiro mutsvene unofadza nekuti tiri munaKristo. Pane munamato weKirike unoti: “Mwari Baba, kuti tikurumbidzei chipo chinobva kwamuri. Chishamiso chekutisika kwamakaita, chinopfuurwa bedzi nemukurumbira nemufaro weupenyu hwedu hutsva munaKristo.” Hupenyu hutsva uhu ndihwo rubhapatidzo runotiita vamwe naKristo, runotigonesa kuzvipira kunaMwari sezvakaita Kristo, anova ndiye Atare, chibayiro, nemupriste.

Chirango chedu chatinoitira Mwari, tichizvipira kwaari muhudiki nehutera hwedu, chinovandudzwa nekunatswa nemweya wekutenda. Uripo zvakare mumwe munamato wepaMisa udodudza pachena shungu dzedu dzekuzvipira kunaMwari kuburikidza nekutenda: “Hapana chatingakupeiwo isu, kusiya kukutendai chete chete. Kana zvazvo imi musingachemeri kutendwa nesu tinogara tichiita izvi kuti tikuratidzei chido chedu, tichibatsirwa naKristo, muromo wedu.” Kristo ndiye anosumudza kuzvipira kwedu kuti kuve chinhu chinofadza kunaMwari. Inga tinoimba wani kuti: “Patinopira chingwa newaini, Yesu anotitora nekutipinza mumupiro wake.” Kana tayera tapinzwa mumupiro waKristo izvo zvidikidiki zvedu zvatingaitewo sechirango chekupa kunaMwari, zvinobva zvave mupiro mukuru unofadza Mwari, unotisvitsa kuhupenyu husingaperi.

Zvechokwadi hatina chinhu chatingapewo Mwari, asi iye Mwari, pamusana perudo nerunako rwake, pamusana penyasha netsitsi dzake kwatiri, anotigonesa kuti timire pamberi pake tichimutenda. Mupriste anonamata achimiririra Sangano rose achiti: “Mwari Baba tinopira kwamuri mupiro uyu wechingwa choupenyu nomukombe weruponeso. Tinoupira tichiyeuka kutifira nekumuka kwakaita Kristo. Tinokutendai imi maita kuti tive pano kuzopira mupiro uyu.” Kusatoti Mwari atikoka, atigonesa, hatitongogoni kuzvipira kwaari. Saka tichimutenda nekutigonesa kwaanotiita, kuti tizvipire kwaari nekumutenda.

Semudzimai weSidhonia, nechirikadzi yemuTembere, takafanana nekashiri kadikiki Timba kanoti neshungu, nemoyo wakaperera kunaNzou, “Mhukahuru pindai mumba.” Kuzvipira kwedu chirango. Asi tikazvipira takabatana naKristo mupiro wedu unova mutsvenetsvene unofadza Mwari. Ngatinamatei kuti sezvo takaitwa vamwe naye murubhapatidzo, tizvipire pamwe naye muYukaristiya Sande.

Amen.

©Fr. William Guri, C.Ss.R., Annapolis MD, 8 November 2015.

Tivavarire Denga!

Zuva raVasande Vose B 2015

Svondo rinotevera 1 November

(Zvakazarurwa 7:2-4,9-14; 1 Yowane 3:1-3; Mateo 5:1-12a)

Mumwe murume akarwara chaizvo ari muHarare. Mushure mekugara muchipatara kwenguva refu pasina kupora akaona kuti nguva yake yekufa yaswedera. Akakumbira kuti aendeswe kumusha kwake, kuruzevha, kuti anofire zvake ikoko. Vakaita sekuda kwake.

Asvika kumusha akakumbira kuti ambovaridzirwe panze pane kamhepo nekazuva. Akakwanisa kusveverera kumacheto kwebonde ndokunyika zvanza zvake zvose muvhu, achibva apfumbata mbutwa mbiri dzevhu, kurudyi nekuruboshwe. Akaramba akapfumbata ivhu iri kudzamara paakazodzorerwa mumba. Husiku hwakare, munamato wake wekuti dai Mwari machindizorodza wakanzwikwa, ndokutura befu kekupedzisira, achibva afa.

Afa kudai izvi, akakanuka atarisana nemazambara egoridhe, pamusuwo wedenga, achichingurwa naPetrosi Musande. Petrosi akamugamuchira nemufaro akamuratidza pekupinda napo munhaka yehupenyu husingaperi, nhaka yedenga, yakatsidzirwa naMambo avo vanofa vakabatana naye, sezvo iye akanga ararama rupenyu rwakanaka. Petrosi akaona kuti murume uyu ane zvaanga akapfumbata mumaoko ake akati:

Petrosi: Chisiya zvawakabata mumaoko ako izvo uchipinde.

Munhu: Kwete. Izvi handisiyi.

Petrosi: Chiiko ichocho chawakabata chinoda kukutadzisa kupinda denga?

Munhu: Iri ndiro ivhu renyika yechibarirwe changu, nyika yechipikirwa, nyika yemadzitateguru angu. Ndakatsidza kuti handisiyi ivhu iri kunyangwe zvodii.

Petrosi: Mwari akakugadzirira nhaka yakanaka kupfuura zvose zvaungafunge zviri pasi pawabva. Mwari achagutsa nzara yose nenyota yose yemoyo wako, ziso rako harina charakaona, nzeve dzako hadzina chadzakanzwa pane zvinhu zvakarongedzerwa naMwari avo vanoonekwa vakakodzerana naye, sewe kudai. Usatye hako, uchava nokushamiswa nekukanuka kusingaperi nezvinhu zvakanaka zvauchapihwa naMwari. Pamusoro pazvose uchange uchionana naMwari huso nehuso zvekuti hakunazve chimwe chaungazode. Inga tinotendera kuti tichazova padyo naMambo nariini wose?

Munhu: Mungataure henyu zvamungataure, asi ivhu rangu handisi kuzosiyana naro. Ndingasva hangu ndarega kupinda denga racho.

Petrosi: Zvakanaka. Mwari worunako rusina mavambo, nerudo rusina magumo, haamanikidzi munhu. Ndiye akatipa njere zvose nesimba rekusarudza. Mwari akasika munhu akamufananidza naiye pachake, kuti amuzive amude, amuitire, agozofara  naye kudenga nariini wose. Munhu akafananana naMwari pakuti mweya wake haurovi nariini wose. Saka Mwari haangamanikidzi munhu kuita chakanaka. Zvakafanira kuti munhu ade chakanaka, agosarudze chakanaka. Ndizvo zvinofadza Mwari, kuona munhu aine rusununguko zvikurukuru rwekusarudza chakanaka muhana make. Saka paunenge waona wave kuda kusarudza kuva naMwari narini wose, unoya ndokuzarurira denga. Gara zvako pano panze wakapfumbata ivhu rako. Mudenga hatina kana puresha sevhiri rakaponja.

Nokudaro murume uye akaramba ari kunze kwezambara regorinde, musuwo wedenga, akapfumbata ivhu rekumusha kwake raakanga asingani kusiyana naro. Hakuna kupera gore, mudzimai wake achibva afawo. Akasvikopinzwa mudenga, ndokutanga kutsvaga murume wake. Atsvagisisa kwose kwaaifunga akabvuza Petrosi kuti sei murume wake anga asirimo mudenga. Akaudzwa nyaya yevhu ndokuenda omene kunopedzerana nemurume wake. Akambozama kunyengerera, kuteterera, kupopotera, kuchenamira, kushaudha, kutuka… kudzamara aona kuti murume wake haasi kuzosiyana nevhu rake. Akazvitadzawo ndokudzokera zvake kundodya nhaka yake yedenga.

Hama dzemurume uyu dzakawanda dzakazofawo. Dzaisvika nekumubvunza, dzoudzwa nhau yekuti ari kurambira panze pedenga pamusana pekusada kusiyana nevhu rake. Vamwe vakamboedzwo kumunyengerera asi hapana akagona kuti asiye ivhu raanga akapfumbata mumaoko, kuti apinde denga. Vazhinji vakangosiyawo zvakadaro voenderera zvavo mberi nekudya machikichori edenga. Hanzi naIzaya muporofita: “Pagomo iri Mwari achagadzirira vanhu vake zvekudya zvakanakisisa, nyama ine mafuta, hupfu hwakatsetseka, waini yakanyatsosvinwa yemakore….”

Mushure memakore makumi masere, kwakazofa kazukuru kemurume uyu, kaakanga asiya kaine makore mana. Kakazofa katova mukweguru ane makore makumi masere nemana, asi kakanga kasina kukanganwa sekuru vako. Ndiye munhu wakakatanga kubvunza pakakapinda mudenga. Kakaudzwawo rungano ruya rwaiudzwa munhu wese, kuti sekuru vako vari kuramba nevhu ravo saka vasiri kupinda mudenga dzvene mune vamwe, mumafaro asingaperi.

Naikowo kazukuru kakati regai ndinotore sekuru vangu. Vanhu vakakaseka vakati siyai kanozvionere kega. Murume uye paakaona kazukuru kake kaaidisisa aka kachiuya kachiri nechekoko, akakwakuka paakanga ari ndokumhanya akananga ikoko. Kazukuruwo pakakaona sekuru vachiuya kakatangawo kumhanya kakatambanudza maoko kakananga sekuru vako. Zvakasvikoti wire, mbunde, ndobva zvadonhesana pasi sekuru nemuzukuru, kuri kufarirana. Hapana akataura nemumwe, vakangosumuka ndokundenderedzana vakananga kumazambara egoridhe ndokusvikopinda.

Pavakaita mawiramombe paya, sekuru havana kuziva kuti ndipo pavakapunyutsa ivhu ravanga vakapfumbata kwemakore makumi masere. Vakazokanuka vave mukati, wanikwe hakuziriko kunaka kwakaita denga, kupenya kwechiso chaMwari, kuimba kwavangere! Kungoonana kwavakaita naMwari huso nehuso hakuna kana chimwe chinhu chakazova nebasa zvakare. Hakuna havi, kana nzara, kana nyota, kana kuda chimwe chinhu kwakazovapo.

MaRoma anoimba nezvekuonana naMwari chiso nechiso uku vachiti: “Mvura yechitubu inoti tonho ichipedza nyota, asi nyota yomiviri chete. Mambo ndimi chitubu chezvikomborero zvose, kudaro nyota yemweya wangu, Mambo, inopedzwa nemi chete.” Pamwezve: “Hongu imi Mwari, munozadza moyo wangu wose, imi moga. Makwana kuneni, munopinda zvose. Ndinoda kugara padyo penyu.” Rwiyo runonzi Tivavarire Denga runoti: “Ndiyani waverenga, kunaka kwose kwaro? Kudenga tozovara!” Augustine Musande akapupurawo achiti: “Makatisika kuti tive venyu, nokudaro mweya yedu haina zororo kudzamara yati yazorora mamuri.”

Nhasi tiri kurangarira vasande vose nevafi vedu vose. Tinotendera kuti Mwari akagadzirira nhaka yakanaka yehupenyu husingaperi kuvanhu vake. Isu tinotarisira kuti pakufa kwedu Mwari achatipawo nhaka imwecheteyo, yaakafonopa vafi vedu vatinorangarira nhasi.

Tinotendera izvi tisingatyi, tiine chivimbo chikuru saMariya Musande akatendera kuti zvose zvakataurwa naMambo zvichaitika. Saka tinotendera tisina kupfumbata, takatambanudza maoko edu ose nekuti hakuna chinhu chiri pano pasi, kana pasi pepasi, chiri kudenga kana kumusoro kwekudenga, chingatiparadzanise naMwari. Chii chaizvo chatingarambe takapfumbata chingakunde kutambanudza maoko, nekuzarura zvanza zvedu kunaMwari?

Ichocho chatinoramba takapfumbata ndicho chichatitadzisa kupinda denga!

Rubhapatidzo rwedu ndirwo chitsidzo chechivimbiso chenhaka yedu yehupenyu husingaperi naMwari munaKristo. Pamisa yevafi tinonamata tichiti: “Tinokumbirirawo mwana wenyu N. wamadaidza nhasi/wamakadaidza/akatisiya. Mutambireiwo azogara nemi. Akaitwa nhengo yaKristo norubhapatidzo. Saka itaiwo kuti azomukawo muvafi zuva richamutswa vafi vaine miviri inopenya sowaKristo...”

Nhasi tiri kupemberera chitendero chatinoyeuchidzwa neKirike pose patinoita muteuro wemisa tichinzwa mwazwi aya: “Zaruriraiwo denga vatenderi venyu vakafa navamwe vose vakafa vaiita kuda kwenyu, vafare nemi ikoko kwamunonyaradza vaitambudzika, vachigara rupenyu rumwechete nemi vachikuonai nokukurumbidzai narini.” Tinotendera kuti Mwari anonzwa munamato wedu uyu zuva regarega, uye achazadzikisa chido nechikumbiro chedu ichi, chatinoturira kwaari tichirevererwa naMweya Mutsvene.

Kirike rinotidzidzisa kunamata mangwanani ega ega munamato weKutarisira: “Mwari wangu, ndinotarisira kwazvo kuti muchandipa nhasi uno girasiya renyu ratakawanirwa na Yesu Kristo, kuti tigozofara nemi kudenga tafa. Ndinotarisira izvi nokuti imi, ndimi makatipikira izvi, munoita zvamakatitsidzira.” Chokwadi Mwari angadzokere shure here pamunamato uyu watinoita tichitungamirirwa naMweya Musande? Zuva rega rega paMisa mupriste anopupura chitarisiro chedu tose pakunamatira vafi achiti: “Tinotarisira kusvitswa ikoko naYesu Kristo, Mambo wedu, nyakutisvitsa zvinhu zvose zvakanaka.”

Ngatinamatei  kunaMwari kuti atipe chitendero nechitarisro nechido zvakazara. Kana Mwari atipa zvipo izvi hatichina basa nekuramba takapfumbata kana chii zvacho mumaoko medu. Vasande vatinorangarira nhasi vakagamuchira zvizere chitendero nechitarisro nechido chaMwari, havana kuramba vakapfumbata zvanza, asi vakatambanudza maoko, vakasiya zvose kuti vazadzwe naMwari oga. Vafi vedu vatinorangarira tinovakumikidza kunaMwari nechitendero nechitarisiro nechido chizere, nekuti tinovimba naMambo, akasika nenga napasi.

Mweya yose yavatenderi vakafa, ngaizorore murudo nerugare rwaMwari. Amen.

_________________________________________________ 

©Fr William Guri, C.Ss.R. Annapolis MD, 1 November 2015. 

Mwanakomana waDhavhiti, ndinzwireiwo tsitsi.

SVONDO 30 REGORE B 2015

YEREMIYA 31:7-9; VAHEBERU 5:1-6; MARIKO 10:46-52

Pane munamato mukuru weMisa unoti: “Munhu akaramba kukuteererai, akachekana hukama nemi. Asi hamuna kuda kuti vanhu vafe vachirova. Makavabatsira kuti vakuzivei, vave venyu. Kazhinji kamakati kuvanhu: ‘Huyai titenderane, imi muve vangu, ini ndive wenyu.’ Makavatumira vaprofita kuzovazivisa zvekuuya kwomuponesi.” (Canon IV).

Munamato uyu unotiyeuchidza dingindira guru renhoroondo yehukama hwedu naMwari rinosanganisira kutadzira kwatinoita Mwari, uye rudo rwaMwari nesu, neshungu dzake dzekuramba achitidzora kwaari. Pamuteuro weMisa wega wega, tinodikanwa kunzi tirangarire zvatakaitirwa naMwari, zvatiri kuitirwa naMwari uye zvatakatsidzirwa naMwari kuti achatiitira. Vakakomborerwa avo vanotendera kuti zvose zvakataurwa naMambo zvichazoitika.

Vaporofita vaiva nebasa rekuyeuchidza vanhu vaMwari zvavakatsidzirwa naMwari. Nekuti kana vanhu vari mukati menhamo nematambudziko, zviri nyore kukangwanwa zvitsidzo zvaMwari kwatiri. Nhamo yangu yandiinayo nhasi, pano pandiri, inogona kundidzimaidza zvekubva ndakanganwa zvose zvakavimbiswa naMwari. Kukanganwa zvitsidzo zvaMwari ndiko kunopa kuti kana tapinda pakuyedzwa titadzire Mwari. Tikayeuka Mwari munguva yekutambudzika nekuyedzwa, tinowana simba rekukunda muyedzi. Kutya Mwari kunoita kuti moyo wako utsige, urege kukurumidzira zvinhu, kana zvaipa.

Muchidzidzo chechiposhi nhasi tinonzwa Yeremiya achitaura mashoko ekusimbisa nekukurudzira vana vaIsraeri kuti vasakanganwe, pavakanga vari mukuyedzwa kukuru. Hanzi: “Onai kuenda kwavakaita vachichema, asi ini ndichavadzosera ndichivanyaradza; ndichavasvitsa pano tunzizi tunoyerera, ndichavafambisa nenzira isina chisingavagumbuse.” Mashoko aya aitaurirwa vanhu vakanga vari pakati pekuomerwa nehupenhu chaizvo. Kuruzhinji rwevanhu mashoko aya ainzwika sekupenga chaiko nekuti zvaisava nyore kufungidzira kuti nhamu yakadai ingapere. Kusatendera uku ndiko kunosaka zvinzi: “Mwari akanunura vanhu vake, chitsama chakasara chavaIsraere.”

Vaprofita vakaparidza kuti kunyaradwa nekununurwa kwevanhu vaMwari uku kuchaitika nekuuya kweMuponesi. Munamato weMisa wandamboreva uya unotiwo: “Kuzoti nguva dzekuti mutinunure dzasvika, makaratidza rudo rwenyu nekutitumira Mwana wenyu pachenyu.” Mutsamba yekuvaHebheru tinonzwa mununuri uyu achitsanangurwa zvaari. Mupriste wegovero raMerkisedheki uyu, anosarudzwa achibva muvanhu  ozogadzwa kuti ave musvitsanisi wavo naMwari. Anogona kupfavira vasina chavanoziva navatsauki nekuti iye pachake akakomberedzwa neutera. Tsamba iyi inotitsanangurira zvakajeka hupriste hwaKristo hwaanotinunura nahwo nekutiwanira kuregererwa kwematadzo edu.  Kristo anozadzikisa kwatiri zvose zvatakavimbiswa nekutsidzirwa naMwari.

Mudama rakanaka tinosangana naye pauzimba, iye akanzi naMwari ndichakutumirai, iye nyakurehwa nevaprofita. Bhartimeo aiva bofu, asi aiziva kuti Mwari akavimbisa kununura vanhu vake sezvatanzwa kuna Yeremiya achiti: “Vachadzokera vari gurumwandira guru kwazvo, vaina mapofu nezvirema…!” Zvino Bhartimeo akanga asangana naye nyakutumwa naMwari kuti izvi zviitike. Ndizvo zvakamupa chivimbo chekumudaidza nemutupo wake uri maererano nebasa rake raakatumwa: “Imi Yesu, mwanakomana waDhavhiti, ndinzwirewo tsitsi.” Kuziva kuti Yesu ndiye Mwanakomana waDhaviti kunoreva kuziva Yesu semuponesi nemununuri waIsraere akatsidzirwa naMwari, nyakurehwa nemagwaro nevaprofita. Munhu wese wenguva yaYesu aiziva kuti ruponeso rwaMwari ruchauya nedungirwa raJesse, uye tsvimbo youtongi hwaMwari haichazobvi muchanza chechizvarwa chaYudha.

Yesu anozadzikisa chishuwo nechikumbiro chaBhartimeo. Vanhu vazhinji vakaona izvi asi havana kunzwisisa kuti chii chaiitika. Havana kuziva kuti ndiko kupenya kwembiri yaMwari pamusoro pavo. Munhu wese anosangana naYesu, akaziva kuti uyu ndiye nyakutumwa naMwari kuzotiponesa, anobva aponeswa. Ani naani anoona Mwanakomana achimutendera anowana upenyu husingaperi. Pamuteuro weMisa tinoona Mwanakomana waDhaviti: Honai Hwayana yaMwari, honai nyakubvisa matadzo apasi….

Kristo anoti kuna Bhartimeo: “Chienda zvako, kutendera kwako kwakuponesa.” Bhartimeo akagamuchira chipo chekuona kuburikidza nekutendera kwake. Akatendera kuti Kristo ndiye mwanakomana waMwari, uyo akanzi achazouya. Kana isu tikatendera kuti Kristo ndiye Mwanakomana waMwari, tikamudaidza kuti atinzwirewo tsitsi, tinoponeswa kubva kuhutera hwedu, kuhupofu hwedu nekumatadzo edu. Ngatinamatirei girasiya rechitendero chakadai. Amen.