“Svinurai nguva dzose muchinamata!”

SVONDO 1 romuAdhivendi C 2015

Yeremiya 33: 14-16; 1 vaTesaronika 3:12-4:2; Ruka 21:25-28, 34-36

“Svinurai nguva dzose muchinamata!”

Nhasi tinotanga nguva yeAdvent, nguva yekugadzirira nekumirira kuuya kwaMambo. Kuuya kwaMambo kuri paviri. Kunoti kuuya kwake kwechiposhi achizvarwa semucheche, nekuuya kwake pakupedzisira kuzodzika denga idzwa nenyika yakanakaka.

Tinopemberera zuva rekuzvarwa kwaKristo musi wa25 December. Ndipo panobva mashoko ekuti “Izwi akava munhu akagara nesu.” Kuuya uku kwakatikoshera nekuti kunotiyeuchidza kutishanyira kwakaita Mwari wedu. Zita rake anozi “Emmanuel,” ndiko kuti Mwarianesu. Saka mavhiki mana anotevera akanangana nekutigadzirira kupemberera zuva iri ratakazvarirwa mununuri. Tinogadzirira kuti Mambo mucheche awane nzvimbo yakanaka yekugara mumoyo medu. Paakazvarwa paBethlehem, akashayirwa imba, akazozvarirwa mudanga, ko nhasi tinoda kuti azvarirwe mudanga zvakare here?

Kuuya kwaMambo kwechipiri ndiko kudzoka kwake pakupedzisira kwaachaita. Tinotendera kuti Kristo akafa akamuka muvafi akakwira kudenga, achazouyzazve kuzotonga vapenyu navafi. Tinogadzirira kuuya kuchaita Mambo uku nguva dzose, asi panguva ino yeAdvent tinonyanya kugadzirira kuuya kwaMambo uku. Tinogadzirira tichiziva kuti Mambo achadzoka kuzotitonga, kuzonatsa nekururamisa zvisikwa zvose. Tinoshuwira kuti kana adzoka atiwane takakodzerana naye. Tinoda kuti kana adzoka azotitore sevasarudzwi vake, agopinda nesu mumbiri yekupenya kwake.

Kuuya kwaMambo kwechiposhi ndiyo nyaya huru yaiparidzwa nevaprofita vakare. Chiporofita chaicho, chemubhaibheri chakanangana nekufanotaurira vanhu zvekuuya kweMuponesi. Muprofita angaporofitewo hake zvimwe zvinhu zvidiki, asi pekupedzisira akanga ari mutumwa waMwari anotaurira vanhu vake zvekuuya kweMuponesi. Ndiro rakanga riri basa guru revaprofita. Chiprofita ichocho chakaperera panaJohane mubhapatidzi. Vatumwa vaMwari vanozotevera mushure mekuuya kwaMambo, basa ravo guru kuparidza zvekufa nekumuka kwaKristo. Vapostori ndivo vakatumwa naiye Kristo, vachitungamirirwa naMweya Mutsvene, kuti vaende kundudzi dzese dzevanhu, nekuzvisikwa zvose zvapasi vachindoparidza dama rakanaka reruponeso.

Muchidzidzo chechiposhi tinonzwa Jeremiah achiti: “Tarisai muone, mazuva ava kusvika andinozoita zvandakatsidzira kuita. Ndichaitira vemba yaIsraeri nevemba yaYuda zviya zvandakavatsidzira.” Vaprofita vaiita basa rekuyeuchidza vanhu vaMwari kuti vasakanganwe zvavakatsidzirwa naMwari, kuti achazovatumira muponesi achazovanunura. Vaive nenhamo zhinji kwazvo, vaive nhapwa, vaigara musango munyika dzisiri dzavo, vachidzvinyirirwa nekushungurudzwa, zvinongoitwavo vanhu vasina misha yavo vagere mativi mana enhika nhasi. Asi Mwari aida kuti vazive kuti haana kuvarasa, uye haana kukanganwa kuvaitira zvakanaka zvaakavatsidzira.

Vaikanganwa chitsidzo chaMwari ndivo vaitsakatikira musango. Asi avo vairamba vakarangarira kuti Mwari achavaponesa, kunyange dai vaifira musango, vaifa vakabatana naMwari. Kutarisira kuuya kwemuponesi ndicho chakava chisimbiso chavo munhamo huru dzavairarama nadzo. Mariya naElizabeth, vakanga vakamirirawo kuuya kwemuponesi uku. Mariya paanoziviswa kuti ndiye achava amai vomununuri anogoverana dama rakanaka iri nehama yake Elizabeth. Elizabeth anobva aona chiriporipo kuti zvose zvakanga zvakatsidzirwa naMwari zvakanga zvazoitika. Saka tinomunzwa achiti kunaMariya: “Mugoni zvako iwe wakatendera kuti zvose zvakataurwa naMambo zvichazoitika.” Mufaro waMariya naElizabeth wakava mukuru pakuziva kuti “mwana akarurama waDhavhiti,” akanga ave zvino pakati pavo. Munguva ino yeAdvent, tinomirira kuuya kwaMambo tiine mufaro mumwechete waMariya naElizabeth. Tinomirira tichiziva kuti mwana achazvarwa uyu, “ndiye achasakisa kuti munyika muitwe zvakarurama nezvinotendeseka.”

Muchidzidzo chechipiri tinonzwa mupositori Pauro achitikomekedza vatenderi kuti tivavarire kuzomira pamberi paMwari Baba vedu tiri vatsvene tisina chatingapomerwe pakuuya kwaMambo wedu Yesu navasande vake vose. Vapositori vakasiyana nevaprofita pakuti vapositori vakanga vave kuparidza vave nedama ranakana rizere. Saka Pauro anotaura nezve “chidzidzo chiya chamakagamuchira kwatiri chemufambiro wamunofarira kuita kuti mufadze Mwari.” Kuuya kwakaita Kristo akazadzikisa zvaitaurwa semviromviro nevaprofita saka vapositori vakanga vave kuzviparidza vaine muti uzere. Vapositori  vakanga vave nedama rakanaka rizere, saka basa ravo guru rakanga rave rekusimbisisa mafambiro chaiwo anodikanwa nedama rakanaka: “hongu matowa nawo, (mafambiro aya), asi tinokukumbirisai nokukukomeresai, muzita raMambo Yesu, kuti munyanye kufambira mberi.” Saka nguva ino yeAdvent tiri kukurudzirwa zvimwe chetezvo, kuti tinyanye kuenderera mberi mumafambiro edama rakanaka takamirira kuuya kwaMambo.

Mudama rakanaka tinonzwa Kristo achitinyeurira nezvekuuya kwake kwechipiri. Hanzi kuchava nekutambudzika nekuparadzwa kukuru chaizvo: “ndudzi dzapasi pose dzichazombwendeswa dzichikangaidzwa nokutinhira kwegungwa nokwamasaisai.” Asi mukati mekutambudzika uku ndimo muchaonekwa mwanakomana wemunhu achiuya ari mugore aine simba nokupenya. Kristo ndiye mwanakomana wemunhu uyu achazouya. Kuuya kwaanoita kunofanira kushingisa nekutsigisa avo vose vanomutevera. Kunyangwe dai nhamo iyoyo ikazotyisa nekurwadza zvakadii, vatenderi vane chitarisiro chekuti vanenge vasiri vega, havachazosiiwi vega senherera. Mwanakomana wemunhu achatishanyira panguva iyoyo ndiye mumwechete anonzi Emmanuel, kana kuti Mwari anesu. Mwari acharamba ainesu kudzamara kumagumo.

Kristo anotinyevera kuti tirambe takasimba, tisaburitswe mugwara nematambudziko aya: “Kana izvi zvoitika, itii twasu, misoro yenyu iti twii: nokuti kusunungurwa kwenyu kwaswedera.” Nekuti tinogona kurasikirwa nenhaka yehupenyu hwedenga, nekuda kwenhamu dzinopfuura. Mazuvano vazhinji vari kurasa chitendero nekuda kwekufunga kuti ruponeso rwaMwari rwavanonokera. Kurwara, kurwarira, kushaya chekubata, kushaya basa, kushaya pekugara, kushaya anoroora kana wekuroora, kushaya mbereko, kutadza kugarisana mumba, kuvengana nehama neshamwari, kufunga kuti ndakaroyiwa, kutya munyama nedzimwe nhamo zhinji zviri kuita kuti “moyo yavanhu iti papata kuoma nokutya.” Pamusana pekutya uku vanhu vaakungoti chamuka inyama, chero ndawana chingandiponese. Kune vanhu vari kuvimbisa kupona, asi vasiri pachokwadi. Izvi zviri kuita kuti vanhu vazhinji vari kutambudzika varasiswe, vanyeperwe, vadyirwe mari, vaparadzane nehama, vabviswe pachitendero chechokwadi, vagosara vari pachena. Ruponeso chairwo runotaurwa naKristo runobva mukutsungirira.

Kristo anotichenjedza zvakare kuti tirege: “Kutindivadzwa moyo nokudyiririra nokudutira…” Mukati nenhamo zhinji zviri nyore kuzvirasira mune zvinhu zvapasi pano. Mukaona nyika dzese dzine hondo kana dzine mamiriro ehupfumi asina kunaka, ndimo munoitwa zvinorova maererano nekuzvifadza panyama nekurarama hupenyu hwemutambarakede pasina kufunga remangwana. Muraramiro wakadai uyu unokonzeresa zvirwere, kuparwa kwemhosva, kumbunyikidzwa nekubhinywa kwevanhukadzi nevana, upomwe, humhondi, kuba, kunyepa - zvinogoneka bedzi kana moyo yevanhu yatindivara nekufunganya nezvehupenyu huno. Zvino Kristo ari kuti chenjerai nokuti: “muchazobva mowirwa nezuva iroro, nokuti richawira vose vanogara pasi paro seriva.”

Kristo anotipa mushonga wekudzivirira matambudziko aya. Mushonga uyu kunamata. Kunamata kwechokwadi hakusi kuya kwatinoita bedzi patinenge tichinzwa kuda kunamata. Kunamata kwechokwadi hakuneyi nekuti zvanakidza, zvafadza zvaita mukurumbira here. Vanhu vazhinji vari kurasika pakunamata nekuti vari kutsvaga zvinogutsameso nenzeve, zvinotekenyedza nyama, zvinoita kuti hana yavo irove, zvinodziisa ropa mutsinga dzavo. Manzwiro akadai handiwo musimboti wekunamata. Kunamata kwechokwadi ndekwekutsungirira, kurambonamata, kunyangwe dai pasina zvaunonzwa zvinotapira. Kunamaka kwechokwadi kuzvipira kugarosumudzira pfungwa nemweya kunaMwari, kana dai wakaneta, usinganzwi kuda, pasina wekunamata naye, pasina ari kukona kuti uri kunamata. Chakakosha pakunamata ndechichi: kuti wauya kuzonamata. Wauya kuzonamata chero nyama dzako dzisiri kuda kunamata, chero pfungwa dzako dzisiri kuda hadzo, chero dai Mweya wako uri kuramba, asi wauya chete pana Mwari, wazvirigira patsoka dzake, uri kugomera uripo pamuchinjikwa panaYesu. Mumwe musi kunamata kunouya nyore nekuzadza moyo nemweya nenyama, asi nguva zhinji kunamata kunonetsa kuuya, kunoita kunge kukama dombo chaiko. Saka Kristo achiti: “Svinurai nguva dzose muchinamata…” kunyangwe dai kunamata kusiri kuuya nyore!

Nguva ino yeAdvent inguva yekuteerera vaprofita, vanotivimbisa zvekuuya kwemuponesi. Inguvazve yekuteerera vapositori, vanotidzidzisa kufamba mafambiro anodikanwa nedama rakanaka raKristo. Inguva zvakare yekuteerera Kristo anotidzidzisa kunamata nguva dzose: “Kuti tiwanikwe takakodzera kupunyuka izvi zvose zvichazoitika, tigomira pamberi paMwanakomana weMunhu!”

Amen.

______________________________________________

 © Fr William Guri, C.Ss.R., Annapolis MD, 29/11/2015.

Kutenda Moyochena

Paivapo.

Kare kare kwazvo.

Kune imwe nyika iri kure kure kwazvo.

Kwaiva nomumwe Mambo akanga akanakisisa kwazvo.

Rimwe zuva Mambo uyu akaitira varanda vake vose mabiko makuru. Paiva nemachikichori chaiwo. Nyama ine mafuta, hupfu hwakatsetseka, doro rakasvinwa zvakanakisisa, miriwo minyoro, michero nemichero, huchi nemukaka.

Tsika dzakanaka dzose dzakauya dzikafadzwa nemutambo uyu chaizvo.

Kuzvidukupisa aivepo, ndiye akanga akazvigarira zvake kwekupedzisira kumacheto chaiko. Akanga akazvirereka achizvininipisa hake.

Rudo akanga aripowo. Rudo ndiye aipakura zvekudya achingoita chipavhurire  kupa kunenge kuramwa. Nyama yakanga isingaverengwi mundiro naRudo. Rudo ndiwo maitire ake, haatyi kuti zvingapere, anongopa, sachireranherera anorera nedzisi dzake.

Kutirira aivepowo. Akanga asingaiti hanya nekuti pane amuonawo here. Haana kuita basa kana dai akazova iye aipedzisira kupihwa chekudya. Kushingirira, kumirira, nekusakurumidza kuvhunduka ndiwo aitire ake muchinda uyu.

Rukudzo aivepowo. Akanga achingozvirigira pasi pamberi paani naani. Aingonzwa kuzadzwa neruremekedzo, achingotyora muzura, kurereka musoro, nekubatanidza maoko.

Chitendero aivepowo. Akanga azere nekutenda zvose zvaaiona zvichiitika, pasina chaanokonona. Chitendero haatsvagi tsanangudzo kana zvikonzero, anongogashira zvinhu sekupiwa kwazvinge zvaitwa.

Chitarisiro aivepowo. Akanga agere zvake padyo naChitendero azere nechivimbo chekuti mutambo ucharamba uchingofadza vanhu vachingodya nekunwa, vachidakara zvavo. Kana zvinhu zviipe sei Chitarisiro haarasi chivimbo.

Munhu wese akanga achifara chaizvo pamabiko akaisvonakisisa aya. Vaifara sekufara kunoita vanhu pakukohwa, sekufara kunoita vanhu pakugowana nyama yemhuka. Vaifara zvisina mukare akamboona.

Mutambo wakati zvino wapfumbira, vanhu vari kufara zvekufara zviya izvi, Mambo ndipo paakacherechedza kuti pane vanhu vaviri vaiita kunge vasingazivani. Mambo pachake aiziva kuti vanhu vaviri ava vanofanira kugara pamwechete ndiko kusaka akavapa zvigaro pamwechete. Asi zvakamushamisa kuona kuti Moyochena naKutenda vainge vasingazivani. Nokudaro Mambo akaswedera kwavari akati:

“Nhai Moyochena, wamboti wambosanganawo naKutenda? Iwe Kutenda, wakamboonanawo naMoyochena uyu here? Nekutika zviri kuita kunge vaviri imi hamuzivani? Kuti kutadza kuona kwangu?”

“Ah, Mambo nhai? Kuti nditi Kutenda uyu mumwe wangu, haa ndinenge ndakunyeperai. Hamufungiwo kudaro? Nekutika ndinongomuonawo pano nepapo, nenguva iri kure, pandinenge ndichishanda zvangu,” akadaro Moyochena.

“Ini kumuona Moyochena uyu, ndinomuona, handingarambi. Asi kuti pane akambotiwo tizivane, haa, apo kwete Tenzi, handingadi kukunyeperai. Kashoma kuona  munhu  anotibatanidza,” akadaro Kutenda.

Tsika dzakanaka mbiri idzi, Moyochena naKutenda, dzakashamisika chaizvo padzakazozivana. Kutenda ndiye akazoti kunaMoyochena:

“Ufunge hako, tinofanira kugara tiri tose nguva dzose. Panowanikwa Moyochena panofanira kuva neKutenda. Asi vanhu vakagamuchira Moyochena, vanokanganwa kutenda!”

Apa ndipo pakafira Sarungano.

Mwanakomana achauya!

Svondo 33 Regore B 2015

Dhaniyeri 12:1-3; VaHebheru 10:11-14, 18; Mariko 13:24-32

Mukupera kwegore reKirike tinosangana nezvidzidzo zvinotaura nezvemazuva ekupedzisira. Bhuku raDhaniyeri rinotiudza nezvenhamo huru nekuponeswa kwevanhu. Vamwe vachamuka vachipinda muhupenyu husingaperi, vamwewo vachamuka vachipinda mukunyadziswa nomukushorwa kusingaperi. Dhaniyeri anotiyeuchidza kuti mushure mekufa muchava nekutongwa, kupihwa mubairo kana kurangwa maererano nemararamire atakaita muhupenyu huno. Dhaniyeri anosimbisa chitendero chedu nekutiudza kuti Mikaeri anozouya mushure nekutambudzika uku. Mikaeri ingirozi yaMwari, pose panosvika ngirozi yaMwari ruponeso rwaMwari runovapo.

Dama rakanaka rinotaurawo nezvematambudziko enguva yekupedzisira. Ndipo pachauya Mwanakomana wemunhu ari mumakore aine simba guru. Achatuma vatumwa vake kunokokorodza vasarudzwi vake pasi pose. Vasarudzwi ndivo vaya vachaonekwa vakakodzerana naye, vanenge vasina kukodzerana naye vacharaswa. Nyaya yokutongwa maererano nemararamire atakaita muhupenyu huno inosimbisiswa zvakare. Sekuuya kunonzi kuchaita Mikaeri, Mwanakomana wemunhu achauyawo pazuva remhedziso. Pose pane Mwanakomana wemunhu pane kuponeswa nehupenyu husingaperi.

Dama rakanaka rinotitaurira kuti: “Kana zviri zvezuva iri nenguva iyi, hapana ani anoziva, kana nengirozi dziri kudenga kanawo naMwanakomana; asi Baba voga.” Patinonzwa nezvekutongwa kwekupedzisira nezuva remhedziso tinobatwa nekutya nekukahadzika kukuru kuti izvi zvichaitika rini? Asi Kristo pachake haana kutiudza kuti ndirini uchaitika izvi. Saka tingaitei neruzivo rwekuti kuchava nekutambudzika nekutongwa kukuru isu tisingazivi kuti kuchavako rini?

Panoitika mhirizhonga nemhere mhere  zviri nyore kufunga kuti ndiko kuguma kwepasi kwakataurwa mumagwaro. Musi weChishanu uno takaona kuParis vanhu vanokarosvika mazana maviri vachipfuurwa nepfuti vachifa. MunaApril takaona kuGarisa University kuKenya vanhu 147 vachipfuurwa nepfuti. Zviri kuSyria, Afghanistan, Burundi, Sudan, hatingatauri. Kune nzvimbo dzakawanda pasi pano mugore rino kwataona vanhu vachiparadzwa nehondo nekurwisana, tisingatauri zvekundengendeka kwepasi nedzimwe njodzi. Ndiko here kuguma kwapasi?

Patinonzwa nezvekuwirwa nedambudziko kwevamwe vanhu tinobatwa nekutya nekukahadzika kukuru. Sekupfuurwa kwakaitwa vanhu kuParis, hapana anoziva kuti mangwana zvichaitika kupi. Maitikiro ari kuita nhamo idzi haana maziviro – zvinogona kungoitika pauri kana pandiri mangwana. Ukazvitarisisa unoona kuti hupenyu hwedu huri pachena. Hapana kungwara, kuzvidzivirira, kunzvenga, kana kugadzirira kwaungaite pfumvu yakadai. Zvinhu zvatinoona mazuva ese sezvisingakuvadzi, zvinogona kukuvadza. Ndege inogona kungoputika mudenga, chitima chinopotsa njanji, vanhu vari kuzvionera havo bhora munhandare vanogona kungoerekana mabara epfuti ave kunaya, vanhu vari kuzvidyira havo mumba mavo,  vanhu vari kuzvifambira, vana vari kudzidza zvavo muchikoro, vanogona kungokanuka vave munjodzi. Hapana paungamboti apa pakanaka, hapana njodzi, panoponesa, ndipo pekuhwanda.

Hanzi naKristo: “Regai muonde ukudzidzisei muenzaniso. Kana maona muonde watunga pfumvudza, moziva kuti zhizha roswedera.” Kunyangwe tisingasivi kuti kuguma kwepasi kuchaitika rini, kuti zuva remhedziso ririko rini, hazvititadzisi kugara tichigadzirira kutongwa kuchazouya. Ko tinogadzirira sei kutongwa kuchazouya mushure mekufa? Ko tingagadzirire sei kuuya kweMwanakomana waMwari ari mumakore achipenya, aine simba guru, pamwechete nevatumwa vake vana Mikaeri?

Pakati pezvisikwa zvose zvaMwari, vanhu ndisu chete tine chipo chekuziva kuti tichafa. Ndosaka tichitya kufa, nekuti tinoziva kuti tichafa. Dzimwe mhuka dzose dzakasikwa naMwari hapana imwechete inofunga nezvekuti ichafa. Mhuka dzinotarisana nerufu parunenge rwatosvika, asi munhu anogara akaziva kuti kufa kuchauya rufu ruchiri kure kure naye. Kuziva kuti ndinofa ndiko kunotungamirira munhu mune zvose zvaanoita muhupenyu huno. ChiKristo chechokwadi hachivanziri munhu nyaya yekuti achafa. “Yeuka munhu uri huruva, uchadzokerazve kuhuruva.” “Mwari ndinoziva ndinofa, asi handizivi sei, kupi, rini…” “Tireverereiwo isu vatadzi, zvino nepanguva yekufa kwedu.” “Pakufa kwangu huyai muzondinyaradza nevaraidzo yenyu inokodzera kuisvodiwa kwazvo.” “Ndinotya kurangwa kunozouya mushure nekufa, mundisunungure…”

Kuziva kuti tinofa ndiko kunotipa kutsvaga Mwari nekuvavarira hupenyu husingaperi. ChiKristo chinotidzidzisa kuti tingararame sei hupenyu huno isu tichiziva kuti tinofa. Kurarama kwatinoita kunoitawo kuti kufa kwatichaita kuve nezvakunoreva. Tikararama hupenyu zvisina gwara, tinofawo zvisina gwara. Tikararama tiri munaKristo, tinofa tiri munaKristo. Tikafa pamwe chete naye murubhapatidzo, tine chokwadi chekuti tichamuka pamwechete naye mukumuka kwake muvafi. “Rudo rwaKristo rwakatiita vamwe naKristo.” “Chiiko chingatiparadzanise nerudo rwaKristo?...Muizvi zvose tiri vakundi, nokuna iye akatida…hapana chinhu chinogona kuparadza rudo rwedu naKristo.

Kana takabatana naKristo rufu harutityisi. Rungave rufu rwekunge tarwara, kana rufu rwekuurayiwa nehondo kana nenjodzi. Kubatana naKristo uku kunobva mukuzvipira kuva pamwe chete naKristo kwatinoita zuva rega rega. Izvi zvinogoneka nekuzvipira kurarama zuva rega rega sekunge ndiro zuva rako rekupedzisira muhupenyu huno. Zvibvunze kuti kana ndikafa nhasi, hupenyu hwangu hwakamira sei? Ndingawanikwe here ndakakodzerana naMwari kana ndikafa nhasi uno? Mwari anganditonge sei kana akandidaidza nhasi?

Ndakambobatsira mumwe musikana akanga kafirwa nehanzvadzi yake. Musikana aichema chaizvo asinganyararidziki nekuti zuva rakafa hanzvadzi yake iyi vakanga vatukana pafoni, akarovera foni pasi nehasha nekuramwa. Paakanzwa kuti hanzvadzi yake yafa, akademba kuti haana kunge ataura naye mashoko akanaka ekupedzisira. Ko aiziva here kuti kutaura pafoni uku ndiko kwekupedzisira nehanzvadzi yake? Ukanyatsofunga kuti mashoko awabva kutaurira mumwe wako, pangadai pari pafoni kana pameso pake, anogona kuva ndiwo ekupedzisira, ungade kuti mashoko aya ave api? Itsika yakanaka usati warara, kuongorora zuva rawaswera uchitarisisa zvose zvawaita nezvawataura. Wozvibvunza kuti Tenzi akati ndipe kuno hoyo mweya wako husiku huno, anouwana wakadii? Kurangarira uku kunotibatsira kukurumidza kupfidza kana tichinge takanganisa. Tikapfidza nemoyo wose tikakumbira kuregererwa, Mwari haatirasi. “Mambo hamudi kuti mutadzi afe, munoda kuti atendeuke ararame.”

Tikafunga nezvekufa kwedu nenzira iyi tinogona kushandura magariro edu nevamwe. Kana tikaziva kuti zuva ranhasi rinogona kuva zuva rangu rekupedzisira, tinogona kuvavarira kunatsurudza maitiro edu kuti agova akarurama. Kuchechi yedu yekuNazareth House kwaive nechinyorwa chandinoda panopfekera mupristi zvekuti mupristi aichiona pose paanopfeka kuti aite misa. Chaive nemashoko anoti: “Mupriste waMwari iwe, vavarira kupira muteuro wemisa uyu wawatarisana nawo, sekunge ndiyo misa yako yekupedzisira.” Mashoko aya akandivhundutsa chaizvo ndichangogazwa. Ndakanyora mashoko aya muhana mangu, zvekuti pakazobviswa chinyorwa ichi, kana pandinoenda kusina chiyeuchidzo ichi, hana yangu inondidzidzisa pamberi pemisa yega yega nemashoko iwaya.

Kurarama tichitora zuva rega rega kunge ndiro zuva redu rekupedzisira kunotibatsira kuti zuva remhedziso rikauya chero nguva ipi rinotiwana takagadzirira. Kristo anotipa muenzaniso wemuonde unotiratidza kuuya kwezhizha nekutunga kwawo mashizha matsva.  Anoenderera mberi achiti: “Naizvozvo nemiwo, kana moona izvi zvichiitika, chibvai maziva kuti iye woswedera, atova pamusuo.” Matambudziko atiri kuona mazuva ose, ngaatiyeuchidze nguva dzose, kuti kuuya kwaMwambo kuri padyo nguva dzose. Zviri kwatiri kuti Mambo anotiwana tiri vanhu vakaita sei. Zviri mumaoko medu kugara zuva rega rega tichigadzirira nekumirira kuuya kwaMambo. “Akaropafadzwa muranda waMambo, anomumirira kusvika adzoka.”

Zuva remhedziso, izuva rinotyisa kufunga nezvaro. Asika zuva iri izuva raMambo. Mambo uyu ndiye Kristo mupriste wedu mukuru. Ndiye achava mutongi wedu. Akatifira kuti tiponeswe, tinunurwe munhamo, uye kuti tisakandwe mukushorwa nemukunyadziswa. Tsamba yekuVaHebheru inotiudza kuti: “Kristo akangopira chibayirwa chimwe chete chinobvisa matadzo…nomupiro wechakamwe akawanira avo vaanoita vake ururami huzere nokusingaperi.” Patinopira mupiro wemisa pose, tinenge tichizvipinza mumupiro waKristo uyu. Tikapira mupiro uyu nemazvo, nemoyo wedu wose, zuva rega rega, kunge zvinonzi ndiyo misa yedu yekupedzisira, zuva remhedziso hatingarityi. “Ngativimbei nechipiyaniso chaMambo, ndirwo ruponeso rupenyu nekumuka kwedu.” Amen.

__________________________

 © Fr William Guri, C.Ss.R., Annapolis MD, 15/11/2015.