Tivavarire Denga!

Zuva raVasande Vose B 2015

Svondo rinotevera 1 November

(Zvakazarurwa 7:2-4,9-14; 1 Yowane 3:1-3; Mateo 5:1-12a)

Mumwe murume akarwara chaizvo ari muHarare. Mushure mekugara muchipatara kwenguva refu pasina kupora akaona kuti nguva yake yekufa yaswedera. Akakumbira kuti aendeswe kumusha kwake, kuruzevha, kuti anofire zvake ikoko. Vakaita sekuda kwake.

Asvika kumusha akakumbira kuti ambovaridzirwe panze pane kamhepo nekazuva. Akakwanisa kusveverera kumacheto kwebonde ndokunyika zvanza zvake zvose muvhu, achibva apfumbata mbutwa mbiri dzevhu, kurudyi nekuruboshwe. Akaramba akapfumbata ivhu iri kudzamara paakazodzorerwa mumba. Husiku hwakare, munamato wake wekuti dai Mwari machindizorodza wakanzwikwa, ndokutura befu kekupedzisira, achibva afa.

Afa kudai izvi, akakanuka atarisana nemazambara egoridhe, pamusuwo wedenga, achichingurwa naPetrosi Musande. Petrosi akamugamuchira nemufaro akamuratidza pekupinda napo munhaka yehupenyu husingaperi, nhaka yedenga, yakatsidzirwa naMambo avo vanofa vakabatana naye, sezvo iye akanga ararama rupenyu rwakanaka. Petrosi akaona kuti murume uyu ane zvaanga akapfumbata mumaoko ake akati:

Petrosi: Chisiya zvawakabata mumaoko ako izvo uchipinde.

Munhu: Kwete. Izvi handisiyi.

Petrosi: Chiiko ichocho chawakabata chinoda kukutadzisa kupinda denga?

Munhu: Iri ndiro ivhu renyika yechibarirwe changu, nyika yechipikirwa, nyika yemadzitateguru angu. Ndakatsidza kuti handisiyi ivhu iri kunyangwe zvodii.

Petrosi: Mwari akakugadzirira nhaka yakanaka kupfuura zvose zvaungafunge zviri pasi pawabva. Mwari achagutsa nzara yose nenyota yose yemoyo wako, ziso rako harina charakaona, nzeve dzako hadzina chadzakanzwa pane zvinhu zvakarongedzerwa naMwari avo vanoonekwa vakakodzerana naye, sewe kudai. Usatye hako, uchava nokushamiswa nekukanuka kusingaperi nezvinhu zvakanaka zvauchapihwa naMwari. Pamusoro pazvose uchange uchionana naMwari huso nehuso zvekuti hakunazve chimwe chaungazode. Inga tinotendera kuti tichazova padyo naMambo nariini wose?

Munhu: Mungataure henyu zvamungataure, asi ivhu rangu handisi kuzosiyana naro. Ndingasva hangu ndarega kupinda denga racho.

Petrosi: Zvakanaka. Mwari worunako rusina mavambo, nerudo rusina magumo, haamanikidzi munhu. Ndiye akatipa njere zvose nesimba rekusarudza. Mwari akasika munhu akamufananidza naiye pachake, kuti amuzive amude, amuitire, agozofara  naye kudenga nariini wose. Munhu akafananana naMwari pakuti mweya wake haurovi nariini wose. Saka Mwari haangamanikidzi munhu kuita chakanaka. Zvakafanira kuti munhu ade chakanaka, agosarudze chakanaka. Ndizvo zvinofadza Mwari, kuona munhu aine rusununguko zvikurukuru rwekusarudza chakanaka muhana make. Saka paunenge waona wave kuda kusarudza kuva naMwari narini wose, unoya ndokuzarurira denga. Gara zvako pano panze wakapfumbata ivhu rako. Mudenga hatina kana puresha sevhiri rakaponja.

Nokudaro murume uye akaramba ari kunze kwezambara regorinde, musuwo wedenga, akapfumbata ivhu rekumusha kwake raakanga asingani kusiyana naro. Hakuna kupera gore, mudzimai wake achibva afawo. Akasvikopinzwa mudenga, ndokutanga kutsvaga murume wake. Atsvagisisa kwose kwaaifunga akabvuza Petrosi kuti sei murume wake anga asirimo mudenga. Akaudzwa nyaya yevhu ndokuenda omene kunopedzerana nemurume wake. Akambozama kunyengerera, kuteterera, kupopotera, kuchenamira, kushaudha, kutuka… kudzamara aona kuti murume wake haasi kuzosiyana nevhu rake. Akazvitadzawo ndokudzokera zvake kundodya nhaka yake yedenga.

Hama dzemurume uyu dzakawanda dzakazofawo. Dzaisvika nekumubvunza, dzoudzwa nhau yekuti ari kurambira panze pedenga pamusana pekusada kusiyana nevhu rake. Vamwe vakamboedzwo kumunyengerera asi hapana akagona kuti asiye ivhu raanga akapfumbata mumaoko, kuti apinde denga. Vazhinji vakangosiyawo zvakadaro voenderera zvavo mberi nekudya machikichori edenga. Hanzi naIzaya muporofita: “Pagomo iri Mwari achagadzirira vanhu vake zvekudya zvakanakisisa, nyama ine mafuta, hupfu hwakatsetseka, waini yakanyatsosvinwa yemakore….”

Mushure memakore makumi masere, kwakazofa kazukuru kemurume uyu, kaakanga asiya kaine makore mana. Kakazofa katova mukweguru ane makore makumi masere nemana, asi kakanga kasina kukanganwa sekuru vako. Ndiye munhu wakakatanga kubvunza pakakapinda mudenga. Kakaudzwawo rungano ruya rwaiudzwa munhu wese, kuti sekuru vako vari kuramba nevhu ravo saka vasiri kupinda mudenga dzvene mune vamwe, mumafaro asingaperi.

Naikowo kazukuru kakati regai ndinotore sekuru vangu. Vanhu vakakaseka vakati siyai kanozvionere kega. Murume uye paakaona kazukuru kake kaaidisisa aka kachiuya kachiri nechekoko, akakwakuka paakanga ari ndokumhanya akananga ikoko. Kazukuruwo pakakaona sekuru vachiuya kakatangawo kumhanya kakatambanudza maoko kakananga sekuru vako. Zvakasvikoti wire, mbunde, ndobva zvadonhesana pasi sekuru nemuzukuru, kuri kufarirana. Hapana akataura nemumwe, vakangosumuka ndokundenderedzana vakananga kumazambara egoridhe ndokusvikopinda.

Pavakaita mawiramombe paya, sekuru havana kuziva kuti ndipo pavakapunyutsa ivhu ravanga vakapfumbata kwemakore makumi masere. Vakazokanuka vave mukati, wanikwe hakuziriko kunaka kwakaita denga, kupenya kwechiso chaMwari, kuimba kwavangere! Kungoonana kwavakaita naMwari huso nehuso hakuna kana chimwe chinhu chakazova nebasa zvakare. Hakuna havi, kana nzara, kana nyota, kana kuda chimwe chinhu kwakazovapo.

MaRoma anoimba nezvekuonana naMwari chiso nechiso uku vachiti: “Mvura yechitubu inoti tonho ichipedza nyota, asi nyota yomiviri chete. Mambo ndimi chitubu chezvikomborero zvose, kudaro nyota yemweya wangu, Mambo, inopedzwa nemi chete.” Pamwezve: “Hongu imi Mwari, munozadza moyo wangu wose, imi moga. Makwana kuneni, munopinda zvose. Ndinoda kugara padyo penyu.” Rwiyo runonzi Tivavarire Denga runoti: “Ndiyani waverenga, kunaka kwose kwaro? Kudenga tozovara!” Augustine Musande akapupurawo achiti: “Makatisika kuti tive venyu, nokudaro mweya yedu haina zororo kudzamara yati yazorora mamuri.”

Nhasi tiri kurangarira vasande vose nevafi vedu vose. Tinotendera kuti Mwari akagadzirira nhaka yakanaka yehupenyu husingaperi kuvanhu vake. Isu tinotarisira kuti pakufa kwedu Mwari achatipawo nhaka imwecheteyo, yaakafonopa vafi vedu vatinorangarira nhasi.

Tinotendera izvi tisingatyi, tiine chivimbo chikuru saMariya Musande akatendera kuti zvose zvakataurwa naMambo zvichaitika. Saka tinotendera tisina kupfumbata, takatambanudza maoko edu ose nekuti hakuna chinhu chiri pano pasi, kana pasi pepasi, chiri kudenga kana kumusoro kwekudenga, chingatiparadzanise naMwari. Chii chaizvo chatingarambe takapfumbata chingakunde kutambanudza maoko, nekuzarura zvanza zvedu kunaMwari?

Ichocho chatinoramba takapfumbata ndicho chichatitadzisa kupinda denga!

Rubhapatidzo rwedu ndirwo chitsidzo chechivimbiso chenhaka yedu yehupenyu husingaperi naMwari munaKristo. Pamisa yevafi tinonamata tichiti: “Tinokumbirirawo mwana wenyu N. wamadaidza nhasi/wamakadaidza/akatisiya. Mutambireiwo azogara nemi. Akaitwa nhengo yaKristo norubhapatidzo. Saka itaiwo kuti azomukawo muvafi zuva richamutswa vafi vaine miviri inopenya sowaKristo...”

Nhasi tiri kupemberera chitendero chatinoyeuchidzwa neKirike pose patinoita muteuro wemisa tichinzwa mwazwi aya: “Zaruriraiwo denga vatenderi venyu vakafa navamwe vose vakafa vaiita kuda kwenyu, vafare nemi ikoko kwamunonyaradza vaitambudzika, vachigara rupenyu rumwechete nemi vachikuonai nokukurumbidzai narini.” Tinotendera kuti Mwari anonzwa munamato wedu uyu zuva regarega, uye achazadzikisa chido nechikumbiro chedu ichi, chatinoturira kwaari tichirevererwa naMweya Mutsvene.

Kirike rinotidzidzisa kunamata mangwanani ega ega munamato weKutarisira: “Mwari wangu, ndinotarisira kwazvo kuti muchandipa nhasi uno girasiya renyu ratakawanirwa na Yesu Kristo, kuti tigozofara nemi kudenga tafa. Ndinotarisira izvi nokuti imi, ndimi makatipikira izvi, munoita zvamakatitsidzira.” Chokwadi Mwari angadzokere shure here pamunamato uyu watinoita tichitungamirirwa naMweya Musande? Zuva rega rega paMisa mupriste anopupura chitarisiro chedu tose pakunamatira vafi achiti: “Tinotarisira kusvitswa ikoko naYesu Kristo, Mambo wedu, nyakutisvitsa zvinhu zvose zvakanaka.”

Ngatinamatei  kunaMwari kuti atipe chitendero nechitarisro nechido zvakazara. Kana Mwari atipa zvipo izvi hatichina basa nekuramba takapfumbata kana chii zvacho mumaoko medu. Vasande vatinorangarira nhasi vakagamuchira zvizere chitendero nechitarisro nechido chaMwari, havana kuramba vakapfumbata zvanza, asi vakatambanudza maoko, vakasiya zvose kuti vazadzwe naMwari oga. Vafi vedu vatinorangarira tinovakumikidza kunaMwari nechitendero nechitarisiro nechido chizere, nekuti tinovimba naMambo, akasika nenga napasi.

Mweya yose yavatenderi vakafa, ngaizorore murudo nerugare rwaMwari. Amen.

_________________________________________________ 

©Fr William Guri, C.Ss.R. Annapolis MD, 1 November 2015. 

Mwanakomana waDhavhiti, ndinzwireiwo tsitsi.

SVONDO 30 REGORE B 2015

YEREMIYA 31:7-9; VAHEBERU 5:1-6; MARIKO 10:46-52

Pane munamato mukuru weMisa unoti: “Munhu akaramba kukuteererai, akachekana hukama nemi. Asi hamuna kuda kuti vanhu vafe vachirova. Makavabatsira kuti vakuzivei, vave venyu. Kazhinji kamakati kuvanhu: ‘Huyai titenderane, imi muve vangu, ini ndive wenyu.’ Makavatumira vaprofita kuzovazivisa zvekuuya kwomuponesi.” (Canon IV).

Munamato uyu unotiyeuchidza dingindira guru renhoroondo yehukama hwedu naMwari rinosanganisira kutadzira kwatinoita Mwari, uye rudo rwaMwari nesu, neshungu dzake dzekuramba achitidzora kwaari. Pamuteuro weMisa wega wega, tinodikanwa kunzi tirangarire zvatakaitirwa naMwari, zvatiri kuitirwa naMwari uye zvatakatsidzirwa naMwari kuti achatiitira. Vakakomborerwa avo vanotendera kuti zvose zvakataurwa naMambo zvichazoitika.

Vaporofita vaiva nebasa rekuyeuchidza vanhu vaMwari zvavakatsidzirwa naMwari. Nekuti kana vanhu vari mukati menhamo nematambudziko, zviri nyore kukangwanwa zvitsidzo zvaMwari kwatiri. Nhamo yangu yandiinayo nhasi, pano pandiri, inogona kundidzimaidza zvekubva ndakanganwa zvose zvakavimbiswa naMwari. Kukanganwa zvitsidzo zvaMwari ndiko kunopa kuti kana tapinda pakuyedzwa titadzire Mwari. Tikayeuka Mwari munguva yekutambudzika nekuyedzwa, tinowana simba rekukunda muyedzi. Kutya Mwari kunoita kuti moyo wako utsige, urege kukurumidzira zvinhu, kana zvaipa.

Muchidzidzo chechiposhi nhasi tinonzwa Yeremiya achitaura mashoko ekusimbisa nekukurudzira vana vaIsraeri kuti vasakanganwe, pavakanga vari mukuyedzwa kukuru. Hanzi: “Onai kuenda kwavakaita vachichema, asi ini ndichavadzosera ndichivanyaradza; ndichavasvitsa pano tunzizi tunoyerera, ndichavafambisa nenzira isina chisingavagumbuse.” Mashoko aya aitaurirwa vanhu vakanga vari pakati pekuomerwa nehupenhu chaizvo. Kuruzhinji rwevanhu mashoko aya ainzwika sekupenga chaiko nekuti zvaisava nyore kufungidzira kuti nhamu yakadai ingapere. Kusatendera uku ndiko kunosaka zvinzi: “Mwari akanunura vanhu vake, chitsama chakasara chavaIsraere.”

Vaprofita vakaparidza kuti kunyaradwa nekununurwa kwevanhu vaMwari uku kuchaitika nekuuya kweMuponesi. Munamato weMisa wandamboreva uya unotiwo: “Kuzoti nguva dzekuti mutinunure dzasvika, makaratidza rudo rwenyu nekutitumira Mwana wenyu pachenyu.” Mutsamba yekuvaHebheru tinonzwa mununuri uyu achitsanangurwa zvaari. Mupriste wegovero raMerkisedheki uyu, anosarudzwa achibva muvanhu  ozogadzwa kuti ave musvitsanisi wavo naMwari. Anogona kupfavira vasina chavanoziva navatsauki nekuti iye pachake akakomberedzwa neutera. Tsamba iyi inotitsanangurira zvakajeka hupriste hwaKristo hwaanotinunura nahwo nekutiwanira kuregererwa kwematadzo edu.  Kristo anozadzikisa kwatiri zvose zvatakavimbiswa nekutsidzirwa naMwari.

Mudama rakanaka tinosangana naye pauzimba, iye akanzi naMwari ndichakutumirai, iye nyakurehwa nevaprofita. Bhartimeo aiva bofu, asi aiziva kuti Mwari akavimbisa kununura vanhu vake sezvatanzwa kuna Yeremiya achiti: “Vachadzokera vari gurumwandira guru kwazvo, vaina mapofu nezvirema…!” Zvino Bhartimeo akanga asangana naye nyakutumwa naMwari kuti izvi zviitike. Ndizvo zvakamupa chivimbo chekumudaidza nemutupo wake uri maererano nebasa rake raakatumwa: “Imi Yesu, mwanakomana waDhavhiti, ndinzwirewo tsitsi.” Kuziva kuti Yesu ndiye Mwanakomana waDhaviti kunoreva kuziva Yesu semuponesi nemununuri waIsraere akatsidzirwa naMwari, nyakurehwa nemagwaro nevaprofita. Munhu wese wenguva yaYesu aiziva kuti ruponeso rwaMwari ruchauya nedungirwa raJesse, uye tsvimbo youtongi hwaMwari haichazobvi muchanza chechizvarwa chaYudha.

Yesu anozadzikisa chishuwo nechikumbiro chaBhartimeo. Vanhu vazhinji vakaona izvi asi havana kunzwisisa kuti chii chaiitika. Havana kuziva kuti ndiko kupenya kwembiri yaMwari pamusoro pavo. Munhu wese anosangana naYesu, akaziva kuti uyu ndiye nyakutumwa naMwari kuzotiponesa, anobva aponeswa. Ani naani anoona Mwanakomana achimutendera anowana upenyu husingaperi. Pamuteuro weMisa tinoona Mwanakomana waDhaviti: Honai Hwayana yaMwari, honai nyakubvisa matadzo apasi….

Kristo anoti kuna Bhartimeo: “Chienda zvako, kutendera kwako kwakuponesa.” Bhartimeo akagamuchira chipo chekuona kuburikidza nekutendera kwake. Akatendera kuti Kristo ndiye mwanakomana waMwari, uyo akanzi achazouya. Kana isu tikatendera kuti Kristo ndiye Mwanakomana waMwari, tikamudaidza kuti atinzwirewo tsitsi, tinoponeswa kubva kuhutera hwedu, kuhupofu hwedu nekumatadzo edu. Ngatinamatirei girasiya rechitendero chakadai. Amen.

Tinokumbira mvura yakakwana....

SVONDO 28 REGORE B2015: KUKUMBIRA MVURA

Dhuteronomiyo 28:1-6, 11-12ab, 1 Petrosi 5:5b-7, Mateo 6:24-34

Paivapo. Kare kare kwazvo, mhuka dzesango dzakawirwa nedambudziko remvura. Nzizi, madziva, matoro, makuvi, zvisipiti, nematsime zvose zvakapwa kukava nekushaiwa kwemvura kukuru. Mhuka dzakagara musangano dzichitsvaga zvekuzvibatsira nazvo. Dzakabvumirana kuti dzichere tsime. Paakanzwa izvi, Tsuro akaoma mbabvu nekuseka: “Munofunga kuti muri vanhu here imi vanochera matsime? Muri mhuka imi hamufi makachera tsime mukabata mvura!”

Zvisinei mhuka, hadzina kuora moyo, dzikashingirira kuchera tsime. Mhuka yega yega, huru nediki, yakatora chijana chayo chekuchera. Tsuro ndiye ega mhuka yakaramba kuchera nevamwe. Akati: “Handingazvinetsi nebasa randinoziva kuti harifi rakabudirira.” Mhuka dzakachera dzikachera, dzikagochera nokuchera dzacherazve, asi mvura yakaramba kubatwa. Tsuro akanyanya kuseka nekunyomba mhuka dzose dzaivavarira kuchera tsime.

Zvino Kamba akauyawo akati anoda kutorawo chijana chake chekuchera tsime. Dzimwe mhuka, naTsuro, dzakamushora dzikati: “Iwe Kamba unechinono, haugoni kufambisa, uri kutipedzera nguva yedu. Rega isu takasimba tinokurumidza tichere.” Asi Nzou akatsiura dzimwe mhuka achiti: “Hama dzangu, Kamba uyu mumwe wedu. Naiyewo anoshaiwa mvura. Ngatimupewo mukana aitewo paanogona, apedzewo shungu dzake. Hazvina mhosva kana dai achinonoka.”

Nokudaro Kamba akapihwa mukana ndokutanga kuchera, dzimwe mhuka ndokuzorora. Kamba akatora nguva refu ari muvhu achifukura dzimwe mhuka ndokukanganwa nezvake. Aichera achiimba chimbo chake achiti: “Chifukufuku, kamba chinozvara matope.” Dzimwe mhuka dzakaseka chimbo ichi dzikanyanya kunyomba Kamba, dzese naTsuro. Dzakakazokanuka kuona mvura ichiti dzutu kubva pasi zvine mutsindo dzikasara dzazara matope. Mhuka dzose dzakazowana mvura yakawanda yakanaka, yakadziraramisa kudzamara pakazonayazve mvura yedenga. Apa ndipo pakaperera Sarungano.

Svondo rakapera pamberi vatenderi vekuBotswana vakaita Misa yavo yekukumbira mvura paGaborone Dam. KuBotswana kune dambudziko guru remvura. Ndakasiririswa kwazvo ndichiona paFace Book mifananidzo yevatenderi vekuBotswana vakaungana padhamu ravo rakaoma kuti papata. Ndikati Mwari honai vana venyu ava, vapeiwo mvura yavanochemera. Dai Mwari akanzwawo kuchema uku.

Svondo rino muZimbabwe vatenderi vari kuitawo Misa yekukumbira mvura. Madhamu edu mazhinji asara nemvura shomashoma. Kana dhamu redu reKariba, rinova rimwe remadhamu makurukuru pasi pose, rasara nemvura shomashoma. Kushomeka kwemvura muKariba kuri kukonzeresawo kushaikwa kwemagetsi munyika yose. Misa yemvura iri kuitwa gore rino tiri pakati pedambudziko guru remvura, sezvo gore rakapera isina kuturuka zvakanaka.

Gore rega rega tinoita Misa iyi panguva dzino dzekuturuka kwemvura. Misa iyi inorevei kwatiri? Ko kana mvura ikasanaya zvakanaka zvakare gore rino mushure mekunge taita Misa iyi, zvinorevei kwatiri? Ko kana isu tikaita Misa iyi, asi vamwe vanodawo mvura sesu vakasabatana nesu zvinorevei? Kana mvura ikanaya zvakanaka tingati here ndisu tinenge tasakisa izvi nekuti takaita Misa iyi?

Kana tichinamatira mvura tiri kupupura chitendero chedu munaMwari muchengeti wedu. Tinovimba naMambo, akasika denga napasi. Tinoziva kuti zvinhu zvose zvatiinazvo nezvatinowana zvipo zvemoyochena waMwari wedu. Moyochena waMwari ndiwo unosaka anayise mvura kumunhu wese, akanaka neakaipa. Kukumbira mvura kwedu kupupura chitendero chedu muna Mwari wemoyochena uyu.

Muna Dhuteronomiyo tinoona kuti mvura iri pakati pezvinhu zvakanaka zvinotarisirwa nevanhu vaMwari vanochengeta mitemo yake. Mozesi anoti: “Mukaramba muchiteerera Mwari Tenzi wenyu achitaura kwamuri muchaona kukomborerwa kwamuchaitwa…Mwari achakuzarurirai denga umo maanochengeta hupfumi hwake hwakanaka. Achanyorovesa nyika yenyu achakupai mvura yakanyatsoringana nenguva yakafanira.”

Petrosi musande anotidzidzisa kuti Mwari anopa avo vanozvidukupisa zvipo zvemoyochena wake. Anotikurudzira kuti tizviise pasi peruoko rwaMwari rune simba tichizviita vaduku kuti agotisimudzira nenguva yake. Petrosi anoti: “Turirai mutoro wose wenhuna dzenyu kwaari nokuti iye ane hanya nemi.” Kana tichipira muteuro weMisa yekukumbira mvura, tiri kuita izvi zvatakadzidziswa naPetrosi mupositiri.

Mudama Rakanaka Kristo anotishingisa kuti tisazvidye moyo. Nyaya yemvura iri kutipa kuzvidya moyo kwakanyanya. Gore rino mvura ichanaya zvakanaka here? Kana mvura ikanaya tichaguta here? Tichawana mvura inozadza Kariba zvakare here? Pfumvu yekushaya magetsi yatiri kuona iyi ichapera nekunaya kwemvura here? Iko kushomeka kwemvura uku asi ndiyo global warming yacho? Asi nyika yedu yave kutoita gwenga takatarisa?

Mashoko aKristo anotiyeuchidza kuti hupenyu hwedu hukuru pane chekudya nechokunwa. Hupenyu hwedu hwakakosha kuna Mwari, anokoshesa kunyangwe tushiri tudikidiki twesango. Kristo anoda kuti tisakanganwe kukosha kwedu pamusana penhamo dzatinosangana nadzo. Nhamo dzinouya dzichienda, asi zvatakatsidzirwa naMwari zvinoramba zviripo narini. Mwari haasi munhu, haanyengedzi uye haakundikani. Mwari haadi kuti tiparadzwe, anoda kuti titendeuke tirarame.

Takatarisana nedambudziko remvura iri, chitendero chedu chiri kubvunzwa kuti: “Inga munotendera muchikonona wani.  Nezvo musazvidya moyo yenyu muchiti, ‘Tichadyei? Tichanwei?’ kana, Tichapfekei?’ Inga izvo zvose ndizvo zvinomhanyirirwawo navahedheni; asi Baba venyu Nyadenga vanozviziva kuti izvi zvose muri kuzvidawo.” Sei tichikonona?

Imwe nyanzvi yezvemunamato yakadzidzisa kuti: Minamato yedu dai ichingova yekutenda chete, nekuti Mwari anoziva kare zvose zvatinoda. Chii chitsva chiri panhamo dzedu chatingaudze Mwari pakukumbira kwatinoita? Nekuti Mwari anoziva zvido zvedu zvose, tingadai tichigaromutenda kutipa kwaanoita zvatinoda zuva rega rega. Misa muteuro wekutenda, nekuti tinoziva kuti Mwari anotipa, nemoyochena wake, zvose zvatinoda. Saka Misa yekukumbira mvura inofanira kupirwa nemweya wekutenda moyochena waMwari mukati mekukumbira kwatinoita.

Tinonamatira mvura kuti tidye tichiguta, kuteera kuti kana takaguta tigone kushandira humambo hwaMwari. Zvipo zvose zvatinopihwa naMwari, kusanganisira Mvura, zvinofanira kutibatsira kuswedera padyo naMwari. Kristo anoti: “Kutangira zvose, tsvagai humambo hwaMwari noururami hwake, nokudaro zvimwe izvi zvose zvichazopamhidzirwa kwamuri.”

Mhuka dzesango padzakarangana kuchera tsime, kuti dziwane mvura hadzisi dzose dzakanga dziine chinangwa chakarurama. Paive naTsuro anoshora vamwe, uye asingadi kubatana nevamwe. Paivawo nevamwe vanotarisira Kamba pasi vanoda kumudzivisa kuitawo pake paanogona napo. Paive naNzou anorwira kodzero dzaKamba. Paivewo naiye Kamba, nyakushorwa, nyakunyombwa, nyakutarisirwa pasi, anozova ndiye nyakubata mvura. Takatarisana neMisa yekukumbira mvura iyi, tinoona kuti mhuka dzese dziripo. Iwe uri mhuka ipi?

Tinokumbira mvura yakakwana, isina mheremhere, inotanga nekupera nenguva yakafanira, inogutsa masango neminda, vanhu nemhuka neshiri, inotigonesa kutsvaga humambo hwamwari takaguta, tinzweiwo Mambo. Tinokumbira kuti mutinzwewo.

Amen.

©Fr. William Guri, C.Ss.R., 11/10/2015, Annapolis MD, USA.