Mugoni zvenyu imi makatendera!

Svondo 4 Advent C 2005

Mika 5:1-4a; VaHeberu 10:5-10; Ruka 1:39-45

Mugoni zvenyu imi makatendera!

Maria paanoshanyira hama yake Elizabeth panoitika chishamiso chikuru chaMwari. Mwana akanga anzi achazozvarwa naMaria aizonzi Emmanuel, kureva kuti Mwari anesu. Elizabeth paanokwaziswa naMaria anobva aziva kuti zvechokwadi Mwari anesu. Kusangana kwehama mbiri idzi uku kunovawo kuvapo kwaMwari. Mwari anesu pose patinosangana muzita rake. Mwari anesu pose patinochingamidzana, patinogamuchirana, patinoshanyirana, patinokwazisana nemumwe munhu sehama yedu yepedyo.

Elizabeth akanga aine hama zhinji kwazvo dzakaita saMaria, asi Maria chete pakati pevanhu vose vehukama, ndiye akaita kuti Elizabeth azive kuti Mwari anesu. PachiManyika tine chirevo chinoti: “Ngewepo ungodaro,” chinowanzoshandiswa nemunhu ari kufarira kushanyirwa kwaaitwa nehama yake.  Maria akagona kuita izvi nekuti akasimuka pamusha pake akaenda kunaElizabeth. Kana tikasimuka pamusha, tikaenda kune mumwe, tikashanyira vamwe, tinokwanisa kuvagonesa kuziva kuti Mwari anesu. Maria haana kuramba ari pamusha pake, akazvipira kushanyira mumwe wake. SaMaria, tiri midziyo yaMwari yaanoshanyira nayo vanhu vake nekuvaratidza kuti Mwari anesu.

Maria aifanira kuti afambe rwendo rurefu nemumakomo kuti asvike kunaElizabeth. Maria naElizabeth vakanga vakasiyana nemakore akawanda chaizvo pakuberekwa. Maria aifanira kuti akunde kusiyana kwavo mumakore uku kuti awadzane naElizabeth. Maria akakunda zvipingidzo izvi zverwendo rurefu, nekusiyana kwavo pamakore, akavavarira kuti asvike chete pane hama yake Elizabeth, nekuti hukama hwavo hwakanga hwakakosha. Vakuri vedu vaiti: “Kure kwegava ndokusina mutsubvu.” “Kusina amai hakuendwi.” “Kune wako hakuna kure.” Mwari anoshandisa hukama hwakagara huripo uhu pakati paMaria naElizabeth kuratidza ivo vaviri, nesu tose, kuti Mwari anoshanyira vanhu vake. Chivanhu chakanaka, netsika dzakanaka, ndihwo hwaro hwakanaka hweDama Rananaka.

Mweya Mutsvene  uyo anozoburutsirwa pane vapositori paPentecoste mushure mekunge Kristo akwira kudenga, tinotanga kunzwa nezvake panoudzwa Maria naAngere kuti achava nepamuviri paYesu. Tinonzwa nezvaMwaya Mutsvene kechipiri panokwazisana Maria naElizabeth. Elizabeth paanonzwa kwaziso yaMaria anonzwawo kusagadzikana kukuru mumuviri wake wose. Kana nemwanawo ari mumimba make anopfakanyika. Semunhu akanga aine chitendero, uye akanga akamirira kuzadzikiswa kwezvakatsidzirwa naMwari, Elizabeth haana kunonoka kuziva kuti kusagadzikana kwake nemwana wake uku rudaviro rwavo kuna Mwari akanga avashanyira. Haana dzimwe pfungwa dzakaipa dzakapinda maari. Pachivanhu zvinonzi ukasangana nemunhu ane ropa rakaipa anogona kukukuvadzira mwana ari mudumbu. Elizabeth paakanzwa kusagadzikana mukati make uku akabva azadzwa naMweya Mutsvene waMwari.

Mweya Mutsvene anonzi naPauro anonamata ari matiri achiguva zvisingagoni kududzirwa nemazwi, ndiye anogonesa Elizabeth kupupura kukomborerwa kwaMaria achiti: “Imi makakomborerwa pakati pevakadzi vose, akakomborerwawo mwana wemimba yenyu.” Mashoko aya anobva mukuzadzwa kwake naMweya Mutsvene. Mashoko akataurwa nemunhu anga akasvikirwa, kana kuti anga akagarwa naMweya Mutsvene. Dai Mweya Mutsvene anga asina kumuzadza, hameno kuti Elizabeth angadai akati kudii kuna Mariya mushure mekunge avhiringidzwa panyama nekwaziso yake kudaro. Pamwe angadai akati: “Nhaiwe Maria, ukati kwakanaka? Nhasi ndinopona ini? Nekutika zvandangozwa izwi rako handichatonzwi zvakanaka. Kana mwana ari mandiri haachina kugandzikana. Asi unondishura nhai Maria?”

Pamusana paMweya Mutsvene waakapihwa, Elizabeth akaona kuvhunduka kwakaita muviri wake paakaona Maria sechikomborero chikuru chisina ani akamboona. Anotobatikana nekutya nekuziva kusakodzera kwake. Semunhu aiva nechitendero chevanhu vaMwari, vaimirira kuuya kwemununuri mune zvinhu zvose, akazadzwa nerufaro rukuru pakuziva kuti zviya zvaigarorehwa zvazoitika, uye zvaitika kwaari. Saka achiti: “Zvandibvira nepikowo, kuti ndishanyirwe kudai naamai vaMambo wangu?” Maria haana kunge awana mukana wekutsanangurira hama yake zvekushanyirwa kwake naangere Gabriel nezvekunzi achava nepamuviri. Asi, pamusana paMweya Mutsvene akanga agara maari, tinoona Elizabeth ave kutoziva kuti Maria uyu, iko kahama kake kamwana kadiki aka, ndivo Amai vaMambo. Chitendero chakadai chinogoneswa bedzi naMweya Mutsvene. Kana pasina Mweya Mutsene waMwari zvakaoma kugamuchira nekutenda kuti Maria ndiye Amai vaMambo. Kana pasina Mweya Mutsvene zvinonetsa kukudza nekuremekedza Amai vaMambo sezvavakakodzera.

Elizabeth chaanoona chinomushamisa, uye chaanoyemura nekukoshesa munaMaria chitendero chaMaria: “Mugoni zvenyu imi makatendera, nokuti zvakataurwa naMambo kwamuri zvichazoitika.” Anomuti “mugoni” nekuti havasi vose vanotendera. Kunyangwe dai Mwari ainesu nguva dzose, achitishanyira munhamo nematambudziko, achivapo nesu pane vaviri kana vatatu, hatisi tose tinotendera nguva dzose. Tinokundikana kutendera zvatakatsidzirwa naMwari. Tinorasa chitendero nechitarisiro. Tinokonona nekushaya hanya. Tinoneta nekurukutika. Tinorasa moyo nekushaya simba. Tinganziwo vagoni zvedu tikatsungirira, tikashingirira, kuramba tichitendera, tichitarisira, tichiita chido. Elizabeth akaona kushinga kwechitendero uku munaMaria saka akamuti ‘mugoni,’ uye ‘makakomborerwa.’

Vadzimai vaviri ava, Maria naElizabeth, ndivo vanhu vanotanga kuzadzwa naMweya Mutsvene muChitenderano Chitsva. Mweya Mutsvene anoshanda mavari chinyararire achigadzirira humambo hwaMwari. Yesu naYowane mubhapatidzi ndivo zvibereko zvaMweya Mutsvene nechitendero chemadzimai maviri aya.  Hukama hwavo hunotiratidza zvishamiso zvikuru zvaMwari. Muhukama hwavo, Izwi akava munhu akagara nesu. Muhukama hwavo tinoona kuti Mwari anesu. Muhukama hwavo tinoona kushanda kwaMweya Mutsvene. Muhukama hwavo tinoona rufaro runounzwa neDama rakanaka unova mucherechedzo wekuti humambo hwaMwari hwasvika pakati pedu.

Tichigadzirira kupemberera kuzvarwa kwaKristo paChristmas, tinotarisa Maria naElizabeth, tichiyemura kushanyirana kwavo kwakanga kwakazara negirasya raMwari. Dai kushanyirana kwedu, nekukwazisana kwedu, panguva ino yeChristmas, kukatigonesawo kuziva kuti Mwari anesu, nekutizadza naMweya Mutsvene. Dai kurumbidza nekurememkedza kwatinoita Maria Musande, Amai waMambo, kwabva munaMweya Mutsvene watakapihwa. Dai kutendera kwedu kuti Mwari achatiitira zvose zvaakatitsidzira, kwatiitawo vagoni, uye vanhu vakakomborerwa.

Amen.  

Ko, isuwo toita sei?

Svondo 3 RomuAdvent C 2015

Ko, isuwo toita sei?

Zephaniya 3:14-18a; VaFiripi 4:4-7; Ruka 3:10-18

Mumwe mudzidzisi akanga achitaurira gungano nezvekuponeswa kwevaIsraeri kubva muuranda hweEgypt. Chimwe chikomana chakanga chisati chambonzwa nhau dzemubhaibheri chakakatyamadzwa zvikuru nekunzwa nhoroondo yekupunyuka kwakaita vanhu vaMwari vachiyambuka Gungwa Dzvuku. Chikomana chakaomerwa nenyaya yekuti Mosesi akarova mvura netsvimbo, mvura ndokupatsanuka, gungwa rikava nyika yakaoama, vanhu vaMwari vakayambuka! Chakazevezera pane aiva padyo: “Iko zvino taakunzwa nhema dzichifushiwa kunge muriwo!”

Pose patinonzwa mashoko tinobatikana nawo. Mamwe mashoko anonakidza, kufadza, kusekesa, kuchemedza, kusuwisa, kana kurwadzisa. Mamwe mashoko anoshamisa, kukanutsa, kukahadzisa, kutyisa, kuvhundutsa kana kupedza simba. Mamwe mashoko anotendeseka, mamwe haatendeseki. Pane patinonyatsonzwa kuti apa tiri kunyeperwa zvechokwadi, nhema dziri kukangwa, dziri kurukwa, dziri kufushwa zvebasa!

Ko patinonzwa kuparidzwa kweDama Rakanaka tinonzwa sei? Kazhinji vanhu vanoita zinatsamukanwa kune muparidzi nekuti zvinotarisirwa kumutenda mharidzo yake. Asi pasina kubatana kumeso, kana kufadzana zvenhema, kana tanzwa shoko raMwari richinyatsoshumairwa tinonzwa sei? Tinoita here sechikomana chiya chakanzwa nhema dzichifushiwa?

MuDama Rakanaka ranhasi tinoona zvinoita vanhu mushure mekunzwa kuparidza kwaYowane mubhapatidzi. Mharidzo yaYowane ine zvainovaita, inovabatabata mukatikati mavo zvekuti vose vanosara vaine mubvunzo mumwe chete: “Ko zvino isu toitei?” Uyu ndiwo mubvunzo wevanhu vanenge vanyatsonzwa Dama rakanaka richipinda mumoyo mavo. Muparidzi chaiye haafadzwi nekunzi: “Haa marova, matema, maita zvinonakidza chose.” Muparidzi chaiye anoshaya kunzwa vanhu vachiti: “Ko zvino toitei?”

Yowane mubhapatidzi akaparidza nenzira yakamutsa moyo yevanhu yanga yakarara. Akavhura pfungwa dzevanhu dzanga dzave nengura. Akazunguza mweya yevanhu yanga isisina simba. Munhu wese akanzwa kuparidza kwaYowane akava neshungu itsva, nechido chitsva, nesimba idzva rekuda kuita zviri nani pane zvaanga ari. Yowane akaparidza nenzira yekuti munhu wese akaona kuti nzira yaanga ari kufamba yanga isiriyo. Akaita kuti munhu wese  apfidze, ade kushanduka, ade kutendeuka, ade kutangisa patsva kurarama hupenyu hwake zviri nani.

Nokudaro Yowane anovaudza zvavaifanira kuti vaite kuti kutendeuka kwavo uku kuve kwechokwadi, kusangove kunzwa zvakanaka mumoyo, asi kuzadzikiswe nemabasa. Anovati: “Anenge aine hembe mbiri ngaape imwe kune asina; uyewo ane chekudya ngaaitewo zvimwe chetezvo.” Pane rwiyo runoti: “Kana manzwa izwi rake, musazoomese moyo yenyu…” Tinoimbazve kuti: “Dama rakanaka rinokushwa muvhu rakanaka, vorigamuchira nekubereka…” Kugoverana zvatiinazvo nevasina ndiwo mucherechedzo wekuti takanzwa Dama Ranakana, tikarigamuchira, rikabereka matiri.

Kuparidza kwaYowane kwakabatabata munhu wese. Hanzi nevateresiwo vakati kwaari: “Mudzidzisi todiikowo?” Iye akavati: “Musabvisise vanhu zvinopfuuridza zvavakanzi vabvise.” Yowane haazezi kutaurira vateresi chokwadi chekuti hazvibatsiri kunamata uchinzwa kudziirwa nekudzamirwa neshumairo mukati mehana mako, asi uchibiridzira vanhu. Kunamata kwechokwadi kunofanira kuperekedzwa nemabasa akanaka, zvikurukuru kugarisana nevamwe zvakanaka. Havasi vateresi voga vanobvisisa vamwe zvinopfuuridza zvavakanzi vabvise. Kana nesi tose tisingabairwi chitupa chehuteresi, tinotadza kugamuchira Dama Rakanaka nezvibereko zvaro pamusana pekubvisisa vamwe zvinopfuura zvavakanzi vabvise.

Kuparidza kwaYowane kwakanzwikwawo nemasoja ayo akatiwo: “Ko isuwo todii?” Yowane akavataurira chokwadi pachena kuti: “Regai kutyisidzira vanhu, kana kuvapomedzera; gutsikanai nemubairo wenyu.” Basa raunoita muhupenyu ringakutadzise here kupinda muhumambo hwaMwari? Hongu, rinogona kukutadzisa kana uchiriita nenzira yekupfuuridza murairo. Vanhu vanofanira kubatwa zvine hunhu hwakanaka mumabasa umu. Kutyisidzira, kumbunyikidza, kudzvinyirira, kudheerera, kutsikirira, nehutsinye hazvisi zvinhu zvinongoitwa nemasoja bedzi. Kana vanhu vasiri masoja vanogona kushandisawo simba ravo kubata vanhu zvisina hunhu kudai. Dama rakanaka riri pachena maererano nekodzero dzevanhu nekubatwa kwavo kwakanaka.

 Chinotarisirwa kana tanzwa dama rakanaka kupfidza nekutendeuka. Dama Rakanaka rinotitsiura tsika dzedu dzakaipa, uye rinotikoka kuti tiswedere pana Mwari. Dama rakanaka rinoda kuti tive nerufaro rwevana vaMwari. Kupfidza nekutendeuka kunotipa mufaro mukati medu. Mufaro uyu unobva mukuziva kuti Mwari haadi kuti mutadzi afe, anoda kuti atendeuke ararame. Mwari anodisa chaizvo kuti tive vanhu vake. Mufaro uyu unobva pakuziva kuti Mwari anesi, uye haadi kuti tirasike, kuti tiparadzane naye.

Rufaro neDama Rakanaka hazvisiyani. Pauro Musande anoti kwatiri: “Hama dzangu, farai nguva dzose, imi makabatana naMambo; ndinotizve farai.” Chisakiso chemufaro uyu ndechichi: “Mambo ari padyo.” Svondo rechitatu reAdvent rinotiyeuchidza mufaro uyu. Tinofarira kuti kuuya kwaMambo, kuzvarwa kwake, kwaswedera. Asi tinoziva kuti iye Emmanuel, Mwari anesu uyu, ari padyo nesu nguva dzose. Aripo pose patinoungana tiri vaviri kana vatatu muzita rake. Aripo pose patinopira chingwa newaini, paanotitora nekutipinza mumupiro wake. Aripo pose patinomuona muchiso chaani naani watinotarisa tichiona maari mufananidzo waMwari, tichiona hama yedu. Aripo pose patinonzwa izwi rake muvarombo nevanoshaya, vanotidaidza kuti tiite moyochena. Gore rino retsitsi nenyasha dzaMwari, rinofanira kusimbisisa matiri ruzivo rwekuti Mwari wetsitsi, nenyasha, Mwari wengoni nerupfave, Mwari wemoyochena nemutsa wose, anesu, ari padyo nesu nguva dzose.

Kuziva kuti Mambo ari padyo ndiko kuziva Dama rakanaka. Kunyangwe dai tikasangana nezvipingaidzo, zvigozhero, zvikanganiso nezvigumburiso muhupenyu, tinoziva kuti Mambo ari padyo. Kana tikasangana nehondo, nenhamo, nenzara, nemhare, kushaya chekubata, kurwara nekurwarirwa, tinoziva kuti Mambo ari padyo. Ko, chiiko chingatiparadzanise nerudo rwaKristo? Hapana chingatiparadzanise nerudo rwaMwari muna Kristo nekuti muzvinhu zvose izvi zvinotinetsa nekutirwisa, tiri vakundi, nekuda kwake iye akatida, akatifira kuti tive vake narini. Rudo rwaMwari rwakadururirwa rwose, mumoyo medu, naMweya Musande watakapihwa!

Zefaniya muporofita, pamberi paYowane mubhapatidzi, akanga afanonyevera runako rweDama Rakanaka paakati: “Kuzoti zuva riya richinge rasvika, Yerusarema ichanzi , ‘Iwe Ziyoni, rega zvako kutya, kana kumboti maoko rengwende! Tenzi Mwari wako anewe; mukundi anokurwira. Achakufarira achifarisisa; rudo rwake ruchakuvandudza, achakupemberera sezvinoitwa pamuchato.’”

Mufaro uyu ndiwo unounza rugare rwaMwari runonzi naPauro: “ndirwo runopfuura zano rose remunhu – ruchabva rwagumbatira moyo yenyu nepfungwa dzenyu, mowaniswa rugare naYesu Kristo.” Svondo rechitatu reAdvent rinotikoka kuti tive nemufaro uyu.

Papa Francis mutsamba yavo yeufudzi, Evangelii Gaudiium, vanotaurawo nezverufaro rweDama Rakanaka, nekututikoka vachiti:

“Ndinokoka vatenderi vose, kwese kwese, panguva ino, kuti vamutsiridze hukama hwavo naYesu Kristo, kana kuti vazarure moyo yavo kuti iye agovaziva; ndinokukumbirai mose kuti muite izvi zuva regarega. Hapana munhu anofarira kufunga kuti uku hakusi kudaidzwa kwake, nekuti hakuna munhu anosiiwa kunze kwerufaro rwaTenzi. Tenzi haarasisi avo vanoshingaira kufamba nzira iyi; pose patinoswedera kuna Yesu, tinoona kuti zvechokwadi aripo nechekare, akatimirira nemaoko akazaruka. Ino ndiyo nguva yekuti kunaYesu: ‘Tenzi, ndakambozvirega ndichinyengedzwa; kazhinji kwazvo kandakatiza rudo rwenyu, asi honai ndadzokazve kwamuri, kuti ndizovandudze chitsidzo changu nemi. Ndinokudai. Ndiponeseiwo zvakare, Tenzi, ndigumbatireizve neruponeso rwenyu.’ Zvakanaka sei kudzokazve kwaari pose patinenge tarasika! Regai nditi zvakare: Mwari haatongoneti kutiregerera, isu ndisu tingatonete kutsvaga nyasha netsitsi dzake…”

Tichinzwa huchapupu hwakadai, kubva kuna Zepheniya muporofita, Pauro Musande, Johane Mubhapatsidzi nekuna Papa Francis, tinonzwa moyo yedu ichiita sei? Tingadavire sei Dama rakanaka iri? Dai Mwari atipawo mwoyo wakarukutika, mwoyo wakatsemuka, mwoyo unodokwairira kuita kuda kwake. Dai Mweya Musande atigonesawo sevanhu, sevateresi, semasoja vakanzwa kuparidza kwaJohane, vakabvunza kuti: “Ko isuwo, toita sei?”

Fr. William Guri, C.Ss.R.

Nguva yaTenzi!

SVONDO 2 ROMUADHIVENDI C 2015

BHARUKI 5:1-9; VAFIRIPI 1:4-6, 8-11; RUKA 3:1-6

Nguva yaTenzi

Bhaibheri rinoshandisa izwi rekuti “nguva” kureva zvinhu zviviri. Chekutanga, nguva inoreva kupindana kwamazuva – zuva rinobuda rigodoka, mazuva achiva vhiki, mavhiki achiita mwedzi, mwedzi ichiva gore, makore achifamba, nguva ichienderera mberi. Uku ndiko kupindana kwemazuva. Ndiyo nguva yatinoona mubhaibheri ichiratidza kureba kwehupenyu hwemunhu, nguva yakatonga mambo, nguva yenzara kana matambudziko. Zvinhu zvese zvinoitika mukati menguva. Nesuwo tinorarama mukati nenguva.

Chechipiri, bhaibheri rinotaura nezvenguva yaTenzi – “zuva raTenzi rava padyo” – nguva yakafanira. Tinonzwa zvichinzi “kuzoti nguva yasvika…” Nguva iyi yakanangana nekuzadzikiswa kunoitwa naMwari zvaakatsidzira vanhu vake kuti achavaitira. Vanhu vaMwari vairarama vaine chitarisiro chekuti Mwari Tenzi wavo achazviratidza kwavari, achavashanyira, achavaitira zvaakavatsidzira, achavaburitsa munhamo, achavaponesa, achavanunura. Izvi vaigara vakazvimirira kuti zviitike. Nguva yaTenzi ndiyo nguva inozadzikiswa zviya zvakanzi naTenzi ndichaitira vanhu vangu. Nguva yaTenzi ndiri dingindira guru rekuparidza kwevaprofita vakare.

Mudama rakanaka ranhasi tinoona Yowane mubhapatidzi achitaura nezvenguva yaTenzi. Sevaprofita vose pamberi pake Yowane anochenjedza vanhu kuti vazvigadzirire kuuya kwenguva yaTenzi. Anodisa kuti kana nguva iyi yasvika kwavari, vanhu vasarasikirwe nemukana uyu. Nekuti nguva yaTenzi inguva yemukana wekuponeswa, inguva yenyasha, inguva yegirasiya. Avo vanogara vakarindira Tenzi, vanomumirira nguva dzose, vanowanikwa nenguva yaTenzi vakagadzirira vagowana makomborero enguva iyi. Avo vanorasa chitendero, vasina chitarisiro, vasingamiriri Tenzi, vanopfuurwa nenguva yaTenzi nemakomborero enguva yakaisvonaka iyi.

Kristo akambotaurira vaJudha achiti, muri chizvarwa chevanhu vakaipa, munoda kuti ndikupeyi mucherechedzo (wekuti nguva yaTenzi yasvika). Hapana mumwe mucherechedzo wandichapukai kunze kwemucherechedzo waJona. Vanhu veNiniveh vachakupomerai mhosva nekuti vakatendeutswa naJona, asi honai imi pamberi penyu pamire zvinhu zvikuru kudarika Jona. Mambokadzi wekuSheba achakupomeraiwo mhosva nekuti iye akabva kumiganhu yapasi kuzoona Solomon, asi honai imi pamberi penyu pamire zvinodarika Solomon (Mateu 12:38-42). Zvose zvakanga zvanzi naMwari zvichaitika, kuburikidza nemiromo yavaprofita vakare zvakazadzikiswa munaKristo, asi vanhu vechizwara ichi vakatadza kumuziva, vakatadza kuona kuti nguva yaTenzi yakanga yasvika. Yowane muVhangeri anopupura achiti: “Akauya kune vekwake, asi vanhu vake havasakamuziva” (Yowane 1:11).

Saka nhasi Yowani mubhapatidzi ari kuti: “Gadzirirai mugwagwa waMambo, ruramisai makwara ake…munhu wose achaona ruponeso runobva kunaMwari.” Aiparidza rubhapatidzo rwekuti vanhu vapinduke mwoyo, varegererwe matadzo avo. Ndiko kuzvigadzirira kunodikanwa kuitira kuti nguva yaTenzi isvike vanhu vakagadzirira, vakazviruramisa, vari munyasha dzaMwari. Vamwe vaprofita vose vaiparidza vachiti nguva yaTenzi ichazouya, asi Yowane mubhapatidzi ndiye muprofita mumwe chete anga aine chokwadi chekuti nguva iyi yazosvika. Ndiyeka nyakukwakuka mumimba paakanzwa ari kutsi kwemeso kuti Amai vomununuri vashanyira amai vake Elizabeth. Amai waYowane pavanoti kuna Maria “Mugoni hako iwe wakatendera kuti zvose zvakatsidzirwa naMwari zvichazoitika,” akabva abatisisa mashoko aya. Ndiko kusaka paanozoona Yesu ari kupfuura nepaaibhapatidzira, Yowane akagona kupupura zvisina angapokane kuti: “Honai hwayana yaMwari nyakubvisa matadzo apasi.” Hupenyu hwake hwose Yowane mubhapatidzi akanga akanangana nekupupura kuuya kwenguva yaTenzi uku.

Gore reKirike rinokamura nguva pakati pemazuva makuru nenguva yemazuva ose. Mazuva makuru eKirike inguva dzakakosha dzinotikoka kuti tipinde muguva yaTenzi. Iko zvino tiri munguva yakakosha yeAdhivendi. Inguva yekugadzirira kuzvarwa kweMuponesi. Inguvawo zvakare yekugadzirira kudzoka kwaKristo pakupedzisira. Saka mashoko aYowane mubhapatidzi akananga nesu kuti tigadzirire mugwagwa waMambo, tiruramise makwara ake, tifushire makomba, tiparadzire zvikomo, titwasanudze zvakamonyoroka, tikwenenzvere zvina magon’a magon’a. Ndiko kuti nguva yaTenzi itiwane takagadzirira, tigogamuchira makomborero enguva yakakosha iyi.

Kuenda kurupinduko, kugashira masakaramende, kuverenga bhaibheri wega uye pamwechete nemhuri, kunamata rusariro nemimwe minamato yenguva ino, kushandira rugare neruenzaniso, kunamatira rugare pasi paose, kubatsira vanotambudzika, kugoverana nevasina, kushanyira vanosuruwara, kunamatira varwere nevasunga, kuzvinyima, kuzvidzora mapangiro emuviri, kuita tsitsi nenyasha kune vamwe, ndidzoka nzira dzeMuKristo dzekuzviruramisa nadzo kuitira kuti nguva yaTenzi itiwane takamumirira.

Musi wechipiri, December 8, tiri kutanga Year of Mercy, Gore reNyasha neTsitsi dzaMwari. Pope Francis vakatanga kudaidzira gore iri tichiri muLent yegore rino. Zvino nguva iya yasvika, yatiri kukokwa kuti titendeukire kunaMwari, tizviwisire munyasha netsitsi dzake, tivewo vane nyasha netsitsi saiye Mwari anotiira tsitsi nyenyasha nguva dzose. Yazosvika nguva iya. Vamwe vedu tichamirira kuona chishamiso kana chiratidzo, asi hakuna mumwe mucherechedzo watichapihwa unotiudza kuti nguva yaTenzi yasvika, kudze kwaJona, nevamwe vaporofita vakafanotaura.

Tiri mukati menguva yaTenzi yeAdhivendi, tichitanga nguva yaTenzi yeYear of Mercy, Pauro musande anotisimbisa muchitendero chedu. Anoti,  “Chandiine chokwadi nacho ndechekuti: iye nyakutanga basa iri rakanaka mukati menyu acharamba achiriita kusvikira zuva raKristo Yesu, kuti achiripedzisa.” Hatifaniri kutya kuuya kwenguva yaTenzi nekuti mhodzi yacho yakatodyarwa kare matiri nerubhapatidzo rwedu. Rudo raMwari rwakadururirwa rwose mumoyo medu naMweya Musande watakapiwa parubhapatidzo. Mwari akatotanga kare matiri basa iri rakanaka, retsitsi nenyasha dzake, reruponeso rwedu, rekununurwa kwedu. Chedu kugamuchira nekushandisa chete zvikomborero izvi.

Papa Francis zvaarikutikokera gore retsitsi nenyasha dzaMwari, ari kutisimbisisa, sekukomekedzwa kwatinoitwa naPauro musande: “Ndinokukumbirirai kuti rudo rwenyu rurambe ruchikura-kura ruchizara neruzivo nenzwisiso dzose, zvinova ndizvo zvingakupei kugara muchiziva kuti ndezvipi zvinofanira kuitwa, zvokuti nezuva raKristo muwanikwe muri vatsvene, musinawo nechamungapomerwe, muzere nezvibereko zvoururami zvatinoberekeswa naYesu Kristo, kuti Mwari ave nomukurumbira nokurumbidzwa.”

Dai iye Mwari akatanga basa iri rakanka matiri, arisvitsa kumugumo waro wakanaka, kusvikira zuva raYesu Kristo.

Amen.

“Svinurai nguva dzose muchinamata!”

SVONDO 1 romuAdhivendi C 2015

Yeremiya 33: 14-16; 1 vaTesaronika 3:12-4:2; Ruka 21:25-28, 34-36

“Svinurai nguva dzose muchinamata!”

Nhasi tinotanga nguva yeAdvent, nguva yekugadzirira nekumirira kuuya kwaMambo. Kuuya kwaMambo kuri paviri. Kunoti kuuya kwake kwechiposhi achizvarwa semucheche, nekuuya kwake pakupedzisira kuzodzika denga idzwa nenyika yakanakaka.

Tinopemberera zuva rekuzvarwa kwaKristo musi wa25 December. Ndipo panobva mashoko ekuti “Izwi akava munhu akagara nesu.” Kuuya uku kwakatikoshera nekuti kunotiyeuchidza kutishanyira kwakaita Mwari wedu. Zita rake anozi “Emmanuel,” ndiko kuti Mwarianesu. Saka mavhiki mana anotevera akanangana nekutigadzirira kupemberera zuva iri ratakazvarirwa mununuri. Tinogadzirira kuti Mambo mucheche awane nzvimbo yakanaka yekugara mumoyo medu. Paakazvarwa paBethlehem, akashayirwa imba, akazozvarirwa mudanga, ko nhasi tinoda kuti azvarirwe mudanga zvakare here?

Kuuya kwaMambo kwechipiri ndiko kudzoka kwake pakupedzisira kwaachaita. Tinotendera kuti Kristo akafa akamuka muvafi akakwira kudenga, achazouyzazve kuzotonga vapenyu navafi. Tinogadzirira kuuya kuchaita Mambo uku nguva dzose, asi panguva ino yeAdvent tinonyanya kugadzirira kuuya kwaMambo uku. Tinogadzirira tichiziva kuti Mambo achadzoka kuzotitonga, kuzonatsa nekururamisa zvisikwa zvose. Tinoshuwira kuti kana adzoka atiwane takakodzerana naye. Tinoda kuti kana adzoka azotitore sevasarudzwi vake, agopinda nesu mumbiri yekupenya kwake.

Kuuya kwaMambo kwechiposhi ndiyo nyaya huru yaiparidzwa nevaprofita vakare. Chiporofita chaicho, chemubhaibheri chakanangana nekufanotaurira vanhu zvekuuya kweMuponesi. Muprofita angaporofitewo hake zvimwe zvinhu zvidiki, asi pekupedzisira akanga ari mutumwa waMwari anotaurira vanhu vake zvekuuya kweMuponesi. Ndiro rakanga riri basa guru revaprofita. Chiprofita ichocho chakaperera panaJohane mubhapatidzi. Vatumwa vaMwari vanozotevera mushure mekuuya kwaMambo, basa ravo guru kuparidza zvekufa nekumuka kwaKristo. Vapostori ndivo vakatumwa naiye Kristo, vachitungamirirwa naMweya Mutsvene, kuti vaende kundudzi dzese dzevanhu, nekuzvisikwa zvose zvapasi vachindoparidza dama rakanaka reruponeso.

Muchidzidzo chechiposhi tinonzwa Jeremiah achiti: “Tarisai muone, mazuva ava kusvika andinozoita zvandakatsidzira kuita. Ndichaitira vemba yaIsraeri nevemba yaYuda zviya zvandakavatsidzira.” Vaprofita vaiita basa rekuyeuchidza vanhu vaMwari kuti vasakanganwe zvavakatsidzirwa naMwari, kuti achazovatumira muponesi achazovanunura. Vaive nenhamo zhinji kwazvo, vaive nhapwa, vaigara musango munyika dzisiri dzavo, vachidzvinyirirwa nekushungurudzwa, zvinongoitwavo vanhu vasina misha yavo vagere mativi mana enhika nhasi. Asi Mwari aida kuti vazive kuti haana kuvarasa, uye haana kukanganwa kuvaitira zvakanaka zvaakavatsidzira.

Vaikanganwa chitsidzo chaMwari ndivo vaitsakatikira musango. Asi avo vairamba vakarangarira kuti Mwari achavaponesa, kunyange dai vaifira musango, vaifa vakabatana naMwari. Kutarisira kuuya kwemuponesi ndicho chakava chisimbiso chavo munhamo huru dzavairarama nadzo. Mariya naElizabeth, vakanga vakamirirawo kuuya kwemuponesi uku. Mariya paanoziviswa kuti ndiye achava amai vomununuri anogoverana dama rakanaka iri nehama yake Elizabeth. Elizabeth anobva aona chiriporipo kuti zvose zvakanga zvakatsidzirwa naMwari zvakanga zvazoitika. Saka tinomunzwa achiti kunaMariya: “Mugoni zvako iwe wakatendera kuti zvose zvakataurwa naMambo zvichazoitika.” Mufaro waMariya naElizabeth wakava mukuru pakuziva kuti “mwana akarurama waDhavhiti,” akanga ave zvino pakati pavo. Munguva ino yeAdvent, tinomirira kuuya kwaMambo tiine mufaro mumwechete waMariya naElizabeth. Tinomirira tichiziva kuti mwana achazvarwa uyu, “ndiye achasakisa kuti munyika muitwe zvakarurama nezvinotendeseka.”

Muchidzidzo chechipiri tinonzwa mupositori Pauro achitikomekedza vatenderi kuti tivavarire kuzomira pamberi paMwari Baba vedu tiri vatsvene tisina chatingapomerwe pakuuya kwaMambo wedu Yesu navasande vake vose. Vapositori vakasiyana nevaprofita pakuti vapositori vakanga vave kuparidza vave nedama ranakana rizere. Saka Pauro anotaura nezve “chidzidzo chiya chamakagamuchira kwatiri chemufambiro wamunofarira kuita kuti mufadze Mwari.” Kuuya kwakaita Kristo akazadzikisa zvaitaurwa semviromviro nevaprofita saka vapositori vakanga vave kuzviparidza vaine muti uzere. Vapositori  vakanga vave nedama rakanaka rizere, saka basa ravo guru rakanga rave rekusimbisisa mafambiro chaiwo anodikanwa nedama rakanaka: “hongu matowa nawo, (mafambiro aya), asi tinokukumbirisai nokukukomeresai, muzita raMambo Yesu, kuti munyanye kufambira mberi.” Saka nguva ino yeAdvent tiri kukurudzirwa zvimwe chetezvo, kuti tinyanye kuenderera mberi mumafambiro edama rakanaka takamirira kuuya kwaMambo.

Mudama rakanaka tinonzwa Kristo achitinyeurira nezvekuuya kwake kwechipiri. Hanzi kuchava nekutambudzika nekuparadzwa kukuru chaizvo: “ndudzi dzapasi pose dzichazombwendeswa dzichikangaidzwa nokutinhira kwegungwa nokwamasaisai.” Asi mukati mekutambudzika uku ndimo muchaonekwa mwanakomana wemunhu achiuya ari mugore aine simba nokupenya. Kristo ndiye mwanakomana wemunhu uyu achazouya. Kuuya kwaanoita kunofanira kushingisa nekutsigisa avo vose vanomutevera. Kunyangwe dai nhamo iyoyo ikazotyisa nekurwadza zvakadii, vatenderi vane chitarisiro chekuti vanenge vasiri vega, havachazosiiwi vega senherera. Mwanakomana wemunhu achatishanyira panguva iyoyo ndiye mumwechete anonzi Emmanuel, kana kuti Mwari anesu. Mwari acharamba ainesu kudzamara kumagumo.

Kristo anotinyevera kuti tirambe takasimba, tisaburitswe mugwara nematambudziko aya: “Kana izvi zvoitika, itii twasu, misoro yenyu iti twii: nokuti kusunungurwa kwenyu kwaswedera.” Nekuti tinogona kurasikirwa nenhaka yehupenyu hwedenga, nekuda kwenhamu dzinopfuura. Mazuvano vazhinji vari kurasa chitendero nekuda kwekufunga kuti ruponeso rwaMwari rwavanonokera. Kurwara, kurwarira, kushaya chekubata, kushaya basa, kushaya pekugara, kushaya anoroora kana wekuroora, kushaya mbereko, kutadza kugarisana mumba, kuvengana nehama neshamwari, kufunga kuti ndakaroyiwa, kutya munyama nedzimwe nhamo zhinji zviri kuita kuti “moyo yavanhu iti papata kuoma nokutya.” Pamusana pekutya uku vanhu vaakungoti chamuka inyama, chero ndawana chingandiponese. Kune vanhu vari kuvimbisa kupona, asi vasiri pachokwadi. Izvi zviri kuita kuti vanhu vazhinji vari kutambudzika varasiswe, vanyeperwe, vadyirwe mari, vaparadzane nehama, vabviswe pachitendero chechokwadi, vagosara vari pachena. Ruponeso chairwo runotaurwa naKristo runobva mukutsungirira.

Kristo anotichenjedza zvakare kuti tirege: “Kutindivadzwa moyo nokudyiririra nokudutira…” Mukati nenhamo zhinji zviri nyore kuzvirasira mune zvinhu zvapasi pano. Mukaona nyika dzese dzine hondo kana dzine mamiriro ehupfumi asina kunaka, ndimo munoitwa zvinorova maererano nekuzvifadza panyama nekurarama hupenyu hwemutambarakede pasina kufunga remangwana. Muraramiro wakadai uyu unokonzeresa zvirwere, kuparwa kwemhosva, kumbunyikidzwa nekubhinywa kwevanhukadzi nevana, upomwe, humhondi, kuba, kunyepa - zvinogoneka bedzi kana moyo yevanhu yatindivara nekufunganya nezvehupenyu huno. Zvino Kristo ari kuti chenjerai nokuti: “muchazobva mowirwa nezuva iroro, nokuti richawira vose vanogara pasi paro seriva.”

Kristo anotipa mushonga wekudzivirira matambudziko aya. Mushonga uyu kunamata. Kunamata kwechokwadi hakusi kuya kwatinoita bedzi patinenge tichinzwa kuda kunamata. Kunamata kwechokwadi hakuneyi nekuti zvanakidza, zvafadza zvaita mukurumbira here. Vanhu vazhinji vari kurasika pakunamata nekuti vari kutsvaga zvinogutsameso nenzeve, zvinotekenyedza nyama, zvinoita kuti hana yavo irove, zvinodziisa ropa mutsinga dzavo. Manzwiro akadai handiwo musimboti wekunamata. Kunamata kwechokwadi ndekwekutsungirira, kurambonamata, kunyangwe dai pasina zvaunonzwa zvinotapira. Kunamaka kwechokwadi kuzvipira kugarosumudzira pfungwa nemweya kunaMwari, kana dai wakaneta, usinganzwi kuda, pasina wekunamata naye, pasina ari kukona kuti uri kunamata. Chakakosha pakunamata ndechichi: kuti wauya kuzonamata. Wauya kuzonamata chero nyama dzako dzisiri kuda kunamata, chero pfungwa dzako dzisiri kuda hadzo, chero dai Mweya wako uri kuramba, asi wauya chete pana Mwari, wazvirigira patsoka dzake, uri kugomera uripo pamuchinjikwa panaYesu. Mumwe musi kunamata kunouya nyore nekuzadza moyo nemweya nenyama, asi nguva zhinji kunamata kunonetsa kuuya, kunoita kunge kukama dombo chaiko. Saka Kristo achiti: “Svinurai nguva dzose muchinamata…” kunyangwe dai kunamata kusiri kuuya nyore!

Nguva ino yeAdvent inguva yekuteerera vaprofita, vanotivimbisa zvekuuya kwemuponesi. Inguvazve yekuteerera vapositori, vanotidzidzisa kufamba mafambiro anodikanwa nedama rakanaka raKristo. Inguva zvakare yekuteerera Kristo anotidzidzisa kunamata nguva dzose: “Kuti tiwanikwe takakodzera kupunyuka izvi zvose zvichazoitika, tigomira pamberi paMwanakomana weMunhu!”

Amen.

______________________________________________

 © Fr William Guri, C.Ss.R., Annapolis MD, 29/11/2015.