Rambai muchiparidza zverufu rwaMambo

Svondo 25 Regore B 2015

Ungwaru 2:12,17-20; Jemisi 3:16-4:3; Mariko 9:30-37

Kuudza mwana hupedzisira. Svondo rakapera takanzwa mudama rakanaka, Mambo wedu Yesu Kristo achitaurira  vadzidzi vake nezverufu nekumuka kwake. Svondo rino tinoonazve Kristo achidzokorora nyaya iyi. Sei Kristo achiramba achidzikorora nyaya iyi yekufa kwake?

Muchidzidzo chechiposhi tinonzwa kufanotaurwa kwakaitwa zvekufa kwaKristo mubhuku reUngwaru. “Kana mururami ari mwana waMwari….ngatimuedzei neutsinye…tione kuzvibata kwaanoita…Ngatimuti afe rufu runonyadzisa.”  Vadzidzi vaifanira kuziva zvakaprofitwa kare izvi kuti ndizvo zvichaitika. Zvakanga zvakanyorwa mumagwaro.

Tikanyatsoverenga bhaibheri tinoona kuti muChitendero Chekare ndimo mune mviromviro dzeChitendero Chitsva. Dama rakanaka raMateu rinosimbisisa chaizvo kuti zvese zviri maererano naKristo zvakarehwa kare mumagwaro anoera. Kristo ndiye anozadzikisa zvizere, zvose zvakafanonyeverwa naMwari kuburikudza nevaporofita vakare.

Kuzoti nguva yakafanira yaMwari yasvika, zviri mumagwaro zvakazadzikiswa. Asi ruzhinji rwevanhu, kusanganisira nevadzidzi vaKristo, haruna kuziva kuti uku ndiko kuzadzikiswa kwezvakarehwa. Munhu mumwe chete anokurumidza kubata kuti kuuya kwaKristo ndiko kuzadzikiswa kwemagwaro anoera, ndiMaria Musande. Tinonzwa Erizabheti achimukwazisa achiti: “Wakakomborerwa hako, nekuti wakatendera kuti zvose zvakataurwa naMwari zvichaitika…”

Vadzidzi havana kuziva zvairehwa naKristo, zvekufa nekumuka kwake. Havana kuziva kuti uku ndiko kuzadzikiswa kwemagwaro anoera kuri kutoitika pamberi pavo. Pamusoro pazvo vakatya kubvunza. Panzvimbo pekubvunza zvairehwa vanotanga kukakavadzana pakati pavo vachitsvaga kuti ndeupi wedu mukuru patiri. Paanovabvunza kuti manga muchitaura nezvei, havana chavanopindura. Zviri pachena kuti nyaya yekukosha kwekufa nekumuka kwaKristo yaipinda nemunzeve yerudyu yobuda nemunzeve yeruboshwe, ivo pasina chavabata.

Kukakavadzana kunoita vadzidzi uku, vachikarira hukuru pakati pavo, ndiyo nyaya iri kutaurwa naJemisi muchidzidzo chechipiri. “Vadikanwi, pane shanje nenharo dzoundingoveni ndipo pane manyongori nehuipi hwose.” “Chiiko chinosakisa kurwisana kwamapato nokukakavadzana kwavanhu mukati menyu?”

Vadzidzi vanokakavadzana nekuti vanoshayiwa ungwaru hunobva kumusoro. Dai vainzwisisa kuti kufa nekumuka kwaKristo kunorevei vangadai vasina kupedza nguva vachikakavadzana zvenhando. Panguva ino vakanga vasati vapihwa Mweya Musande. Panozoburukira Mweya Musande pamusoro pavo, ndipo pavanochizoti bengenu, voona pachena kuti zvairehwa mumagwaro anoera zvainangana naKristo. 

Jemisi anotidzidzisa kuti ngwaru hunodikanwa kuti pave nehunhu huzere. Ungwaru hunobva kunaMwari ndihwo hunotigonesa kunzwisisa kutambudzika nekufa kwaifanira kuita Kristo. Kristo haana kutiponesa nekuparidza, kuita zvishamiso, kudzidzisa, nekuporesa varwere bedzi. Kristo akatiponesa nekutifira kwaakaita pachipiyaniso nekumuka kwake muvafi. Marwadzo nerufu rwaKristo ndicho chishamiso chikuru chekununurwa kwedu.

Pamuteuro weMisa wega wega tinodaidzwa kuti tipemberere Mununuri wedu. Tinodaira tichiti: “Tinokurumbidzai Mambo, imi makatifira, imi makamuka, muchazouyazve.” Tikatadza kubata ipapa apa panoti Kristo akatifira akamuka muvafi, tinenge tapotsa Misa.

Pamuteuro weMisa mupriste anosimbisisa nyaya iyi yekutifira nekumuka kwakaita Kristo chero akasarudza munamato upi:

“Mwari Baba, tinoita zvinotiyeuchidza Mwanakomana wenyu Yesu Kristo. Nezvo isu, vana venyu, tinoyeuka kutambudzika kwake nekumuka kwake muvafi, nokukwira kwake kudenga…” (Canon I).

“Mwari Baba, tinopira kwamuri mupiro uyu wechingwa cheupenyu nemukombe weruponeso. Tinoupira tichiyeuka kutifira nekumuka kwakaita Kristo…” (Canon II).

“Mwari Baba, tiri kuyeuka kutifira kwakaita Mwana wenyu nokumuka kwake kunoshamisa nokukwira kwake kudenga…” (Canon III).

“Mwari Baba vedu, uyu ndiwo mupiro watakanunurwa nawo. Unotiyeuchidza kutifira kwaKristo nokuenda kwake kuvafi. Tinopemberera nawo kumuka kwake nokukwira kwake kudenga…” (Canon IV).

Saka Dama Rakanaka ranhasi riri kutiyeuchidza zvakare nyaya yakanyanyokosha iyi, yekutifira nekumuka muvafi kwakaita Kristo. Ndatanga nekubvunza kuti sei Kristo achiramba achidzokorora nyaya iyi? Anoramba achiidzokorora nekuti kutifira nekumuka kwake ndiko kwaakatinunura nako, uye ndiko kwaanoramba achitinunura nako nanhasi. Kirike rinodawo kuti tigare tichidzikorora kurangarira kufa nekumuka kwaKristo. Saka vanotaura vachiti: Dzokororo ine simba. Uye vakuru vakareva vakati: Kuudza mwana hupedzisira.

Ngatinamatei:

Mwari baba tipeiwo simba rekuti tirambe tichifunga, upenyu nekufa, nekumuka muvafi kwaMambo wedu, Yesu Kristo…

Amen.

____________________________________________

©Fr William Guri, C.Ss.R., Annapolis, MD. 19/09/2015

"Nhai imi, vanhu vanonditi ndini ani?"

Svondo 24 Regore B

Izaya 50:45-9a; Jemisi 2:14-18; Mariko 8:27-35

“Nhai imi, vanhu vanonditi ndini ani?”

Pane chimwe chikoro Mudzidzisi Mukuru, Mr Moyo, vaitsvinyirwa kuti vaRangwani nekuti vakanga vari varefu. Chimwe chikomana chakafunga zvekusaenda kuchikoro rimwe zuva. Chikati zano rakanaka kufonera kuchikoro ndichiita saamai vangu, ndovaudza kuti John ari kurwara. Chakaridza foni ichibva yadairwa nemukuru wechikoro pachake:

VaMoyo: Kudzidza Ishungu School. NdavaMoyo vari kutaura.

John: Mangwanani vaRangwani. Ndinoda kukuzivisai kuti mwana wangu     John ari kurwara saka haasi kuuya kuchikoro nhasi.

VaMoyo: Zvakanakai. Ndingazivewo  here kuti ndiyani afona?

John: Hongu vaRangwani. Ndini amai wangu!

Kana uri mukuru wechikoro, weparish, wemhuri, wepabasa kana weboka ripi, igaroziva kuti vanhu vane zita rekunemera ravanokupa, risiri zita rako repachitupa. Rinodaidzwa usinganzwi asi haritani kunamira pauri. Dzimwe nguva zita iri rinoenderana nezvauri uye unogutsikana naro. Asi dzimwe nguva haufari nezita iri nekuti rinotaura zvauri, sekuonekwa kwazvinoitwa nevamwe, asi iwe usingadi kuti zvizivikanwe kana kutaurwa.

Panozoita mumwe munhu anogona kupisira oita kuti uzive kuti vanhu vanokudaidza kuti ani. Kana zvinoonekwa nevanhu zviri pauri zviri zvinhu zvawakasununguka nazvo, unogona kuseka nekufara paunonzwa zita rako iri. Asi kana zita iri richikuyeuchidza zviya zvaunoda kuti zvisafe zvakazivikanwa nemunhu, unogumbuka chaizvo. Vanhu vazhinji vanoziva kuti vane zita ravanopihwa asi vanosarudza kusariziva, zvongovharana zvakadaro. Iwe ungade here kuti vanhu vakuudze kuti vanokudaidza kuti ani, zvisiri zvepachitupa?

Mudama rakanaka ranhasi tinoona Kristo achibvunza vadzidzi wake mubvunzo uyu, wakatiomera tose: “Nhai imi vanhu vanonditi ndini ani?” Funga baba kana amai vako, mukuru wekubasa kwako kana kuparish kwako, akakubvunza mubvunzo uyu. Ngatitii iwe unoziva zita raanonemerwa, ungamuudza here kuti vanhu vanokutii Hariyatsva, kana kuti Benyumundiro, kana kuti Malema?

Kubvunza kwaanoita uku, Kristo anotiratidza kushaya kutya kwake, kana kuti kushinga kwake. Nekuti kuudzwa zvauri nevamwe kunoda wakashinga mwoyo.  Kushinga kwakadai kunobva mukuziva zvauri nepaumire pamberi paMwari. Kristo aive neruzivo ruzere pamusoro pehunhu hwake nehuMwari hwake zvekuti akanga asingatyi uye asineyi nekuti vanhu vanganditi ndini ani. Ruzivo runosunungura urwu runobva mukubatana naMwari nguva dzose, zvikuru mukunamata. Munhu ane hukama hwakadai naMwari haatyi kana kuzeza marehwarehwa evanhu.

Vadzidzi vanopindura Yesu nekumuudza zvinotaurwa nevanhu pamusoro pake: “Vamwe vanokutii Yowane mubhapatidzi, vamwe vachikutii Eriya, vamwewo vachikutii muri mumwe wevaprofita.” Asi Kristo haagumiri ipapo, anodzikisa gejo, obvunza akavananga ivo: “Ko imi munonditi ndini ani?” Kristo anoda kuona kuti vadzidzi vake ava vari kumuziva zvechokwadi here kana kuti vari kungoitawo gudzamudungwe kufanana neruzhinji.

Kuziva Kristo kwechokwadi, kwete zvemarehwarehwa evanhu, kana zvemanzwiranzwira ndiko kunotiponesa, uye ndicho chinhu chatinofanira kuvavarira nehupenyu hwedu hwese. Pauro anoti: “Asi ndakaona zvinhu zvese semarara pamusana pekukosha kukuru kwekuziva Kristo, Mambo wangu.” (VaFiripi 3:7) Anoti zvakare: “Pandaive nemi ndakazvipira kuti handina chimwe chinhu chandichaziva kunze kwaiye Kristo ega, iye nyakurovererwa pachipiyaniso.” (1Vakorinde 2:2). Iye Kristo pachake akati: “Zvino hupenyu husingaperi ndihwo uhwu: kuti vakuzivei, imi Mwari mumwechete wechokwadi, naYesu Kristo, uyo wamakatuma.” (Johane 17:3).

Kristo zvaanobvunza vadzidzi vake, haasi kuda kuvafumura kana kuvabatikidza mazita avanomunemera nekumutsvinyira nevanhu. Chinangwa chaKristo ndechekuti vadzidzi vazive iye Krsito, nyakutumwa, nyakuteerera, nyakutifira, nyakumuka muvafi, nanyakutiwanira hupenyu husingaperi. Kristo anoda kuvadyara, kuti vadzike midzi yavo munaMwari kuburikidza nekuziva iye Kristo.

 Shungu yaKristo yaakazadzikisa pamberi pekutifira kwake ndeiyi: “Ndakaitisa kuti zita renyu rizivikanwe nevanhu avo, vamakandisarudzira muvanhu vapasi pano, kuti muvape kwandiri. Vakanga vari venyu mukabva mavapa kwandiri , ivowo vakachengeta dama renyu. Zvino vava kuziva kuti zvose zvamakandipa zvakabva kwamuri; nokuti mazwi amakandipa ndakaapawo kwavari, ivowo vakaagamuchira vakabva vaziva zvechokwadi kuti ndakabva kwamuri, vachitenderawo kuti imi ndimi Nyakundituma.” (Johane 17:6-8).

Saka tinoona Kristo achitaurira vadzidzi vake pachena, asingambovanzi zvekuti ayifanira kutambudzika zvakanyanya, kurambwa, kuurayiwa nekuzomuka muvafi. Iri ndiro zita raKristo rechokwadi raanoda kuti vadzidzi vake vabatisise. Hunhu hwake nehuMwari hwake zvinozadzikiswa nekuzvipira kwake kutitambudzikira nekutifira. Ndizvo zvakaporofitwa naIsaya muchidzidzo chechiposhi kuti: “Handina kuramba kumuteerera, handisakamupa gotsi. Ndakarega vavengi vachindipura musana, ndakarega matama angu achikakatwa ndebvu. Handina kudzivira uso hwangu kuna vaindikanda mbama nokundipfira mate.”

Petrosi paanonzwa izvi anoda kutsiura Kristo nekuti anotya kuti vanhu vakaziva chokwadi ichi vangaore moyo vakatiza Kristo. Asi Kristo anodisa kuti chokwadi ichi chizivikanwe kunyangwe dai chichirwadza sei. Kristo anotaurira vanhu pachena kuti: “Kana munhu achida kunditevera, ngaazvirambe iye pachake, atakure chipiyaniso chake, anditevere, nokuti uyo anoda kuzvichengeta achazvirasa, asi uyo anozvirasa nokuda kwedama rakanaka ndiye achazviponesa.” Ndizvo zvinoreva zita raKristo rechokwadi, ratinozvinemera naro kuzviti VaKristo!

Jemusi musande, muchidzidzo chechipiri, anotichenjedza kuti tisaite chitendero chekutaura bedzi chisina mabasa. MunaKristo tinoona munhu akaratidza chitendero chake nemashoko zvese nezviito. Kristo zvaanotaura kuti achaita nudama ranakanaka ranhasi – kutifira pachipiyaniso – anozviita chokwadi zvichionekwa nemunhu wese. Chitendero chake nemabasa ake hazvina kuparadzana, zvakaringana. Jemusi musande ari kutikurudzira kuti tivewo saizvozvo.

Ukaziva zita remunhu, rechokwadi, repachitupa, unenge wave nesimba pamusoro pemunhu iyeye. Unogona kumutsvaga ukamuwana, unogona kumutevera kusvika paanogara. Munhu waunoziva zita rake anenge ave munhu wako. Zita remunhu harisi ruzha runobva mukanwa, kana mavara akanyorwa pabepa bedzi. Zita remunhu rakafanana nemwoyo nemweya wemunhu pachake. Zita remunhu rinoyera nekukosha zvakaita munhu iyeye. Zita remunhu rinoremekedzwa nekukudzwa semuridzi waro.

Nhasi Kristo ari kutibvunza kuti: Nhandi imi, vanhu vanonditi ndini ani? Anonenderera mberi nekutibvunzazve kuti: Ko imi munonditi ndini ani? Iwe pachako, pauri ipapo unopindura Kristo uchiti kudii? Ungapindure here zvizere saPetrosi kuti: “Ndimi Kristo.” Kana ukabvunzwawo unokwanisa here kudaira kuti: “Ndiri muKristo” kana kuti unoita saJonso akabvunzwa navaMoyo kuti ndiyani akati: “Ndini amai vangu!”

Zvese nemunaKristo Mambo wedu. Amen.

©Fr. William Guri, C.Ss.R., 13/09/2015, Annapolis MD USA.

"Vakakomborerwa vanonzwa dama rakanaka vachiritendera!"

Svondo 23 Regore B

Izaya 35:4-7a; Jemisi 2:1-5; Mariko 7:31-37

Pauro Musande akati kuvaRoma: “Munhu ari wose anodaidza zita raTenzi, achaponeswa. Asi vangamudaidze sei kana vasina kumutendera? Ko vangamutendere sei kana vasakambomunzwa nezvake? Ko vanganzwe nezvake sei kana pasina avaparidzira? Ko vangaparidze sei kana vasina kutumwa kundoparidza? Nekuti ndizvo zvakanyorwa (naIzaya) kuti: “Dzakaropafadzwa tsoka dzeuyo anoparidza dama rakanaka.’ ” (Rom:10:15-15).

Pauro anotidzidzisa kuti chitendero, neruponeso, zvinobva mukunzwa dama rakanaka raKristo (Rom 10:17) Johane anotanga rungano rwedama rakanaka  nekutiziviza nezveIzwi. Pakutanga kwakanga kuina Izwi, Izwi aigara naMwari, Izwi ndiye Mwari …. Izwi akava munhu akagara nesu. Akauya kune vekwake, asi havana kumutendera. Ani naani anotendera kuti Krsito ndiye Mwanakomana waMwari nyakutumwa (ndiko kuti Izwi) achawana hupenyu husingaperi. Hupenyu husingaperi kukuzivai (imi Mwari) naYesu Kristo wamakatuma.

Kutadza kunzwa dama rakanaka kutadza kunzwa Izwi raMwari, uye kutadzawo kugamuchira ruponeso nekutadza kuwana hupenyu husingaperi. Yesu akanga asina mashoko akareruka kune avo vaitadza kunzwa dama rakanaka pamusana pekuomesa moyo yavo. “Ndingafananidze neiko rudzi urwu? Rwakafanana nepwere dziri pamusika dzinoti kune vamwe vadzo, ‘Takuridzirai hwamanda asi hamuna kutamba, tikawungudza asi hamuna kuchema…’” (Mateu 11:16-17)

Jeremiya akatukawo vana vaJakopo achiti: “Chinzwai imi mapenzi evanhu vasina njere, mune nzeve asi hamunzwi, mune maziso asi hamuoni…” (Jer 5:21) Izaya akatiwo: “Munonzwa asi hamunzwisisi, munoona asi hamuonesesi” (Is 6:9).  Saka Kristo akasarudza kutaura nemadimikira nekuti vanhu vakanga vasingadi kuteerera: “Saka ndichivataurira nemadimikira nekuti kunzwa vanonzwa asi havatongonzwi, kuona vanoona asi havatongooni” (Mateu 13:13).

Kristo akasangana nekusada kuteerera, nekuramba kugamuchira Izwi kwevanhu vake zvikamurwadza chaizvo. MuDama rakanaka ranhasi anosangana nemunhu akanga asingagoni kunzwa kana kuteerera pamusana pekuti akanga akaremara, ari matsi uye chimumumu. Kutadza kunzwa kwake kwakanga kusiri kuomesa moyo, kana kuzviitisa. Kana dai dama rakanaka raiparidzwa aripo, akanga asingagoni kurinzwa nekuritendera, nekuponeswa naro. Hapana chaaigona kuita kuti Izwi apinde maari agogara ari maari.  Ko aizowanawo sei hupenyu husingaperi hunobva mukuziva Kristo, anonzwikwa panoparidzwa dama rakanaka?

Munhu aive matsi nechimumu uyu akanga asingagoni kuzvinzwirawo mashoko erufaro nechivimbiso akataurwa naIzaya: “Taurirai vano moyo unotya muchiti, ‘Tsungai moyo! Rasayi kutya kwenyu! Onai Mwari wenyu ava kuuya: anouya kuzotsividza anozoripisa vakakutadzidai. Anouya iye pachake kuzokununurai’” Hapana kana chinhu chimwechete chaaigona kunzwa pamashoko akanakisisa aya. Mashoko aya akanakira munhu wese saka nyakuaparidza achinzi tsoka dzake dzakaropafadzwa mujinga megomo, uyo anounza dama rakanaka. (Is 52:7)”

Jemisi musande anotirayira kuti tisaite rusarura mumba maMwari nekuti tingadaro tikatadzisa vamwe kunzwa dama rakanaka reruponeso. Tikaita rusarura tafanana nemunhu anouraya nzeve dzemumwe kuti atadze kunzwawo mashoko eruponeso. Tine muyedzo wekuchingamidza nekugamuchira zvakanaka vapfumi, asi tichidzingira varombo kure. Mukuita izvi tinenge tichiita kuti pamusoro pehurombo hwavo varombo vatadze kunzwawo dama rakanaka. Jemisi anotichenjedza kuti: “Handiti Mwari akasarudza avo vanoonekwa nevadi vezvapasi savarombo kuti vave vapfumi mukutendera, vabve vogara nhaka youmambo hwakapikirwa avo vane rudo here?”

Saka Kristo anosangana nemunhu uyu, akanga asingagoni kunzwa dama rakanaka, nekuriparidzawo kune vamwe. Kristo akamunzwira tsitsi chaizvo. Akarwadzirwa munhu uyu nekuti aiziva kuti rupeneso rwaaipa kuvanhu pachena, hwaida kuti munhu azvinzwire dama rakanaka. Kristo haana kugona kusiya munhu uyu ari murima rekusanzwa iri. Moyo waKristo, moyo munyoro moyo waYesu, wakakotamira kwaari. Nyasha netsitsi, tsiye nyoro nekunzwira munhu uyu marwadzo ake ndizvo zvakaita kuti Kristo amutore aende naye parutivi, amurape, apore. Ndokuchitanga kwake kunzwawo mashoko akanaka eruponeso.

Kristo anodisa chaizvo kuswedera padyo nevanhu vasingagoni kunzwa dama rakanaka kuti vaponeswe. Kune zvipingaidzo zvakawanda zvehupenyu zvinotadzisa munhu kuti anzwe dama rakanaka. Hahusi humatsi hwega, asi rutadzo, hudzvanyiriri, kushaya ruzivo, kushaya chekubata, kurwara nekurwarirwa, kurasikirwa nechekuraramisa, kushaya basa, kushaya anoroora kana wekuroora, kushaya mbereko, kutadza kugarisana nehama…nezvimwe zvigozhero zhehupenyu zvinogona kutiita matsi dzisinganzwi dama rakanaka uye zvimumumu zvisingagoni kuparidza dama rakanaka muhupenyu hwedu nhasi. Rinoparidzwa raparidzwazve tiripo, asi kana tiri matsi muhana dzedu, tinganzwe asi tisinganzwisisi, tigoona tisingaonesesi.

Ngatitendeukirei kunaYesu timukumbire kuti atirape humatsi huri hupi hwatiinahwo hunotitadzisa kugamuchira dama rakanaka nekuritendera nekuwana hupenyu husingaperi. Tikazarura moyo yedu nepfungwa dzedu, Kristo anouya kwatiri oti: “Ephphata!” ndiko kuti “Dzivuka!” nzeve dzedu dzobva dzadzivuka nechinotibata rurimi chinobva charegedza, ndokubva tonzwa nekutaura zvakanaka.

Vakanyanyokomborerwa zvavo avo vanonzwa dama raMwari vachiritendera.

Amen.  

©Fr. William Guri, C.Ss.R., 05/09/2015, Annapolis MD USA.